【一啖砂糖一啖鹽】又呢又路委員會

既然「降低食物中鹽和糖」都可以成立委員會，珍妹大膽建議在辦公室成立各個「又呢又路委員會」，共襄善舉。

針對港人「重口味」的現實，港府早前特別成立「降低食物中鹽和糖委員會」，鼓勵年輕人吃得清淡一點。好，既然「降低食物中鹽和糖」都可以成立委員會，珍妹大膽向各位HR及老闆建議，在辦公室成立各個「又呢又路委員會」，為打工仔、同事謀福祉，共襄善舉。

建議辦公室內成立5大委員會︰
1/ 山長水遠返工委員會
委員特徵︰住新界、條頸chok到甩甩地（搭車釣魚）、曾經跑返工跑到甩鞋

是咁的，香港地工商業區多在市區，住新界的「村姑、鄉下仔」不得不長途跋涉搭車搭船再100米飛奔仆返公司。以屯門至柴灣計，來回車程就夠飛來回台灣了。

爭取權益︰彈性上班、在家工作、遲到免找數綜合援助

2/ 延長lunch hour得閒飲茶委員會
委員特徵︰食飯食到felifalat、間歇性消化不良、的士搭到窮

本港辦公室lunch hour一般1粒鐘。幸運的話，公司附近就有味道和質素ok的平民飯堂；但一覺唔覺意，辦公室方圓800里都人多車多，就係食肆唔多，單是出去搵個飯食就花上大半小時……未計爬返公司的時間喎……

爭取權益︰強烈要求延長食飯時間、公司包伙食、支持小商戶在商業區經營住家食堂

3/ OT O到無朋友委員會
委員特徵︰爆瘡、狂躁、熊貓眼、持續性聽唔到鬧鐘響

阻人收工者，即間接謀殺，兼直接影響同事社交及感情生活！香港打工仔OT至7點、8點屬「常態」——唔係唔使OT呀嘛——晚晚O到9點、10點亦非甚麼新鮮事；尤其是會計和審計等行業，做通頂近乎「行規」。然而，別將「硬食」合理化。

爭取權益︰搭的士返屋企有得claim、包晚飯、零食無限供應、公司裝電視

4/ Sick Leave免覆老細奪命Whatsapp委員會
委員特徵︰趁你病攞你命3000、唔係放假都唔知自己咁重要

今期流感肆虐，公司同事輪住嚟sick；唯獨班老細鬼打無咁精神，Whatsapp一味奪命追魂。

爭取權益︰病要休息是常識吧，畀條生路行下啦！

5/ 星期一想快啲星期五委員會
委員特徵︰星期日晚焦慮、唔敢相信周末完結、星期一射波症候群

是日星期二，相信各位打工仔到目前為止，都無法接受要返多4日工先有假放的事實。哲學題︰世界上星期日到底存不存在？

爭取權益︰星期一返半晝、星期五提早收工4小時

延伸閱讀︰
- 【不做發水麵包】初春消腫7法

- 【缺眠】15徵兆 睇你中幾個？

- 【破舊立新】拆解7大過氣健康「常識」

- 【肥過肥仔】6大易爆煲賀年食品

- 【情人節】4大密會熱選（拍拖、單身皆宜）

上載日期︰2015年3月17日