comScoreTag
FancyBox
FancyBox

Workplace Gossip

不是做到隻狗就會有花紅


董德少



workaholic
世上最不合乎成本效益的,莫過於愈努力愈用錯力,愈做愈衰。
上星期大老闆捉著J的「痛腳」,數落他最近落晒volt,做事甩漏,幾乎令公司錯失幾百萬大客。「德少,你點睇?」天下間老闆最厚顏的地方,在於主觀性搜證後,臨判斬一刻紓尊降貴「徵詢」夾心管理層「意見」,輕輕鬆鬆將「做醜人」的責任四兩撥千斤卸得一乾二淨。

「其實J一向工作表現都唔錯,上年為公司爭取咗x客單大生意;上次我地完成咗yy單大嘢,都係多得佢仆心仆命幫手……」老闆望著我,釋出不。要。再。說。下。去。的強烈訴求。「不如我同佢傾下。」然後我就滾水淥腳自行退下。

我將事情的來龍去脈轉告J,純粹出於善意,示意他睇路。「好心無好報。」他的眼神極其兇狠,盡是無聲控訴。辦公室的空氣裡瀰漫著比舞台更緊張的張力,劇力萬鈞,戰線一觸即發。

「我唔係嚟迫你,反而係想叫你放鬆啲。」我見J的眉頭沒皺得那麼緊,繼續︰「其實,你付出幾多,大家有眼見。不過我咁睇,你可能迫得自己太緊。」

J還是沒出聲,明顯更不耐煩了,是工作狂的徵兆。我繼續︰「不如答我幾個問題︰

1/ 近來係咪覺得力不從心?成日都有種挫敗感?
2/ 係咪成日唔記得嘢?例如你今朝食咗咩早餐?
3/ 係咪睇任何同事都唔順眼?你應該都會覺得我好厚多士。
4/ 枱面係咪愈嚟愈亂?成日搵唔到文件、鉛子筆;要備份嘅反而拎咗去碎?
5/ 經常發白日夢?
6/ 返工唔開心?唔可以好似以前咁享受工作?
7/ 容易病咗?
8/ 將工作問題同情緒帶返屋企?」

「咁又點?」J終於開口。

導致工作狂的原因很多,除了「為世所迫」的因素之外,還包括完美主義、控制欲強、恐懼,甚至自我價值偏低等。

「好簡單︰1/ 有咩幫手要開聲。唔好自己死啃;亦唔好以為啲嘢只有自己先識做或者做得好;2/ 管理好時間。呢個星期限定自己6點準時收工;放工後安排私人活動,唔好諗住公事。你試下先,或者會有意想不到嘅效果。」

工是要返的,嘢亦必須做好,然而過猶不及。世上最不合乎成本效益的,莫過於愈努力愈用錯力,愈做愈衰。風雨過後不一定有美好的天空,不是做到隻狗就會有花紅。共勉之。

延伸閱讀︰
- 別以人地把刀插自己

- 跳火坑變跳火圈

- 有AO,真係唔做?

- 打工仔的斬纜權

- 劈炮前必經的混沌狀態

上載日期︰2014年9月8日

讚好 CTgoodjobs 專頁,獲取更多求職資訊!

以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

Free Subscription

Email