【人物專訪】治療師首創腦運動言語治療 助女童由反應緩慢到成為學生司儀

撰文:霍芷晴 攝影:matt

相信所有父母都很擔心小朋友的成長,希望他們健健康康長大,不過現今學童有很多都遇到言語上的障礙,有的語言遲緩、有的音調失調。而早於2006年衞生署及城市大學研究顯示,本港患有發展性語言障礙的學齡兒童約為5%,至今定有增長。而夏小月言語病理學(言語治療)診所的創辦人夏小月指,其實除了兒童外,成人都會機會遇有言語方面的問題。

夏小月已經執業了近30年,既是認證感覺統合治療師、心理治療師、並是全港首位推行腦運動言語治療的資深言語治療師。她指:「除咗兒童個案有所上升外,因為人口老化問題,令成人言語障礙嘅個案都有增加,例如失語症、中樞構音障礙等。」但怎樣才算是有言語問題?夏小月續指:「有時小朋友咬字唔清晰、口吃、因為大叫得多而聲沙,用錯聲帶、講嘢甩音,都係需要言語治療嘅徵狀。」她指有時構成言語障礙的根本原因是出自於情緒,所以治療方案上都會顧全這一方面;「成人方面,有時中風都會導致語言問題,例如失語症,而近年中風都有年輕化趨勢,所以成人嘅治療個升都多咗。」

首創腦運動言語治療
一般言語治療着重使用桌面活動和工具,帶領對象說話,而夏小月則提倡用腦神經運動結合言語治療(Neuromotor Speech Pathology,NSP),因為成功的言語治療,是需要兒童建立良好的神經傳送能力,作為配合的;因此,開發神經接收能力須與言語治療同步進行。兒童在腦袋得以開發後,能更有效地吸收治療師給予的刺激;言語更快進步之餘,所有腦袋支配的能力,都同時進步。

夏小月表示:「我哋診所設有體育室,用一啲運動形式嘅活動,激刺對象腦部嘅神經接收系統,例如畀小朋友坐喺鞦韆上,一邊搖一邊將豆袋掟去個籃入面,鞦韆搖嘅時候,小朋友耳內嘅耳水會郁動,繼而刺激到腦部提醒身體要坐直,一邊又要平衡同掟豆袋,控制時間性同埋考慮空間同方向感,需要一定嘅協調。」

夏小月指多年來遇過很多不同的個案,每每看到對象有所改善,都令她很感恩,「見到有啲小朋友由唔多講嘢、成績未如理想,到之後肯去表達自己,仲拎埋獎學金,真係會好開心;我哋診所會比較多小朋友個案,對象由7個月大嘅BB到中三嘅學生都有。」記者驚訝7個月大的嬰兒,連說話都未學會,怎樣發現他有言語問題呢?夏小月指,「個案嘅BB有吞嚥問題,一出世就要用胃喉,更有可能要造人工胃造口,所以家長嚟搵我哋求助。我哋主要係要刺激BB喉嚨位置,強化吞嚥感覺。我哋將BB嘅下身抬起少少,得佢自己控制個頭起身,強化頸部肌肉加上肢體嘅配合,持續訓練下,最後成功可以吞到奶。」

個案分享:由理解力欠奉 至成為學生司儀
而在眾多個案中,夏小月對於Sophie的個案尤其深刻,因為她的進步非常大,訪問Sophie時,她的口齒伶俐,思路清晰且樂意表達自己,又怎能想像她曾經有語言問題?現年16歲的Sophie表示:「我讀小學二年級時已經發現自己學習上有啲問題,老師叫我哋隔行寫字,重複咗三次,我都好似理解唔到佢講乜。直至到小學三四年級,有次上IT堂,老師又係講咗三次要按其中一個掣,但我好似接收唔到呢個指示咁。」Sophie因為反應緩慢,對語言的組織能力不足兼欠缺自信,所以於校內成績不算理想,更沒有甚麼朋友,常常被欺負。

之後,Sophie的媽媽帶她到夏小月的診所接受治療,「我覺得夏老師好好人,佢肯去聆聽、慢慢咁同我傾偈。我最記得係運動課室,有攀石、有滑梯、有車仔、有鞦韆,然後去做啲任務,手腳協調都好咗。」夏小月指:「治療嘅兩年間,Sophie成日聽錯治療師嘅說話,要多番重覆先有反應,表現咗佢嘅聲音傳遞缺陷;除此之外,佢反應緩慢,表示佢嘅信息傳遞速度不足;加上,佢會有時出現游離狀態,所以,總結係佢嘅腦神經功能不足。要處理Sophie嘅障礙,必須從根本神經傳送開始,再配合言語治療,先可以快速且有效咁解決困難。」

Sophie笑言治療過程都是愉快的,每次都覺得很開心,亦慢慢願意表達自己,自信心增加之餘,對於語言的接收和組織能力都有所提高,「我喺功課上面已經冇太大問題,朋友亦都多咗,更加喺小學畢業典禮上做學生司儀!」

可以點入行?
夏小月表示,現時香港對言語治療師的需求高,大學相關科目的學士亦見競爭激烈,「一般喺大學修讀言語治療學士學位課程,畢業後已經可以成為執業治療師。而在學時沒有修讀言語治療,亦可以考慮修讀兩年言語治療碩學課程而入行。」夏小月指,學生畢業後,可以到NGO、政府機構及私人機構執業,包括醫院、學校及教育中心等,現時都很需要言語治療師。

有興趣成為言語治療師需要具備甚麼條件呢?夏小月認為:「一定要鍾意小朋友、溝通能力強、兩文三語都唔可以太差、學術能力高,因為始終呢個係對人嘅行業,所以最緊要係有心想幫人。」她希望日後可以將腦運動言語治療推廣到香港以外的地方,更有效地幫助大家克服和改善言語問題。

延伸閱讀:【NGO熱話】做NGO一定人工低福利少?網民見工一解4

延伸閱讀:【NGO】善牧會籌辦「支援及住宿」計劃 助無家女生擁有一個「家」

延伸閱讀:【NGO】導盲犬同治療犬有咩分別? 訓練員:治療犬嘅職責就係「玩」!

延伸閱讀:【NGO熱話】員工一腳踢 期望升職卻希望落空 網民:公司唔識尊重人…

Look out for further updates on our Facebook fan page!

Looking for jobs?