comScoreTag
FancyBox
FancyBox

人際八卦

假如沒有遇過x老細……


董德少



bad boss
能夠遇到一個半個x老闆是福氣,即使未能從他們身上學會怎樣做個好人,至少亦能搞清楚不要做個怎樣的上司。

「德少,我下星期一生日,可唔可以唔返工……但唔扣假?」90後同事K笑騎騎問。「你搞掂晒啲嘢拿?」見他當場謝晒,我補上一句︰「有難度咩?搞唔掂啲嘢嘅話,真病都要你喺屋企做。」再附送一個奸人堅的奸笑。

K呢,雖然論勤力無份,不過勝在夠話頭醒尾︰「得!我而家即刻去做。」笑笑口就走出去了。他自然聽得懂我的潛台詞——做晒嘢我理得你咁多。本人其實相當欣賞K事前磊落提出「放假唔扣假」要求的做法,總好過有些人工作愈疊到排山倒海,愈喜歡臨時臨急whatsapp話「想請日sick」、「嗚!病倒了,想請日假」之類。我堅係多得佢地唔少。

今次皆大歡喜,我可以get the job done,K亦求仁得仁獲得幸福生日假一個,而更重要的是得以維持辦公室和諧的完整性。最怕啲人返工苦口苦面,彷彿全世界虧欠了他們似的。而樣衰,是會傳染的。

這個世界,誰也不曾拖欠誰,老闆既沒欠員工甚麼,員工自然亦不是老闆的債仔。我相信,老闆與打工仔純屬角色定位,兩者之間並沒有主次和從屬關係,情況就像普通話與廣東話的關係一樣。

作為半管理層的親身體會,小弟只能說,如果連同事生日返不返工都要理,我咪好唔得閒?

在我還是黃毛小子的那些年,遇上過「老佛爺」式老闆,同事表面上唯唯諾諾,暗地裡各自打算,「切」的「切」,走的走。就從那時候開始,我立志,要是有朝一日當上管理層,一定不會重蹈覆轍。回想起來,能夠遇到一個半個x老闆是福氣,即使未能從他們身上學會怎樣做個好人,至少亦能搞清楚不要做個怎樣的上司。

這分「福氣」,相信每個打工仔都享有。

延伸閱讀︰
- 詛咒「射波」星期一

- 「被透明」的散水者

- 成為人地辭職原因之前

- 插手去玩辦公室政治之前

- 好人不是這樣做的

上載日期︰2014年2月24日


讚好 CTgoodjobs 專頁,獲取更多求職資訊!

以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

Free Subscription

Email