升職、加薪、劈炮的籌碼

辭職信, 大學畢業, Expected Salary, 加薪, 工作經驗, 升職, 劈炮

至少讓他知道他是個被欣賞、值得被挽留的人才，他朝去到另一個工作環境，仍能抓緊自己的籌碼，不卑不亢，頂天立地。

「德少，我做左10幾年，愈做心理愈唔平衡。」同事U欲言又止。我望望他，示意願聞其詳。他繼續︰「我而家收人CV，個個Expect $1.3萬以上。我知，我知而家咩都貴，要求$1.3萬係好合理，但……」

年尾流流，作為資深中層夾心管理打雜，收到一封半封辭職信是意料中事。然而，接到可造之才U的辭職信，不是不令小弟相當「Sam Hui」的。

先交代一下U的人物背景︰
30出頭；大學畢業那年，正值沙士肆虐。那是香港的一道傷口，對於當時被拋擲到職場的年輕人來說，更是個大毒瘡——禍害甚深，U自然不能倖免。

U深明自己被時代選中，第一份工Expected Salary已經「收得好順」填$7500，仍遭壓價壓到$7000；唯抱著「共度時艱」的信念「再收順啲」——對比今時今日的大學生，畀少個崩都無得傾。10多年間，表現稱不上超班，但總算合乎預期above average；由助理主任仔做起，升至助理經理；加薪方面，基於例牌跑輸通脹兼老闆「升你職已經皇恩浩蕩」的原則，每年平均加5%至10%。

而到這個臨升為經理的關鍵時刻，U遞信了。「唔好意思，德少。」他低著頭，顯然有意逃避與我眼神交流。我就知道，事有蹺蹊。

「我對你咁好，點解你咁對我？」這類怨婦式單細胞問題不但違背小弟人物性格；而且有數得計，不必check record，U現在逗幾錢人工我心裡有數，說「我對你咁好」豈非違反邏輯。只有壓抑內心不安，試探一句︰「我有無嘢可以幫到你？」

謙厚的U沒說話。他撐了這麼多年，已經很義氣仔女了。我自責竟然一直沒為他發聲，爭取合理權益，此時此刻只好盡量填滿空虛的對話︰「明白嘅，你都要向自己交代，而且10幾年工作經驗絕非浪得虛名。」

「不如咁啦，封信你收番先。話我知你expect幾多，畀一個星期時間我，我盡fight。如果公司都畀唔到你嘅要求，我扣番呢個星期通知期，兼寫埋reference letter、鋪紅地氈祝你前程似錦。」我開了這個盤口，希望U明白公司沒有遺棄他——至少讓他知道他是個被欣賞、值得被挽留的人才，他朝去到另一個工作環境，仍能抓緊自己的籌碼，不卑不亢，頂天立地。

延伸閱讀︰
- hea做不如劈炮

- 【人才清洗】「睇路」5預兆

- Appraisal非禮勿言6句

- 【派Job】派得優雅6招

- 不做「奴性強」

上載日期︰2015年2月2日