comScoreTag
FancyBox
FancyBox

人際八卦

咪「老點」我!


賈心潔



appoint
我不喜歡你,幫忙叫「老點」;我喜歡你,老點就叫做「順手」。

「係咪有病呀?我細佬個女朋友老點我細佬剝蝦殼!」朋友W「些牙」的時候非常勞氣,氣場足以同時抵擋3個十號風球。而一直以來,老點細佬老點得最透的,明明是她……而家啲港女……

「剝蝦殼呀大佬!分明係老點我細佬囉!」W自己都經常性迫細佬做呢做路,有口話人無口話自己。我沒說話,只是瞄了瞄她,暗笑。

W繼續︰「有無搞錯!真係當自己公主呀?」我其實認為,既然細佬覺得OK,你情我願,阿家姐妳嬲甚麼呢?突然想起「一山不能藏二虎」的定律。因為公主遇上公主了,而細佬從來沒幫過W剝蝦殼,這是重點吧。

不過公道一點,我深信W如何恰細佬,都不會叫他剝蝦殼,至多迫他生吞椰殼。「剝蝦殼喎……你唔剝咪唔好食囉!做咩迫人剝畀你食?」她說。

「你理得人地,你自己夠成日畀你男友老點做呢樣做嗰樣。」我純粹想轉移話題,因為W的細佬,以及W的細佬的女朋友,都不是我感興趣的對象——說得明白一點,就是「關我鬼事」。

「丫,係,你陣間得唔得閒?順手幫我買2張戲飛。」我老奉。

「咩戲、幾點?」W睥著我,又如夢初醒︰「喂,你又話拎張Coupon畀我,講咗10世,拎咗去邊?」

人與人之間,幫來幫去、點紅點綠,「誰老點誰做甚麼」其實都無所謂;唯一有所謂的,是我們覺得有無所謂。

我不喜歡你,幫忙叫「老點」;我喜歡你,老點就叫做「順手」。

這樣亦解釋到,我們為甚麼一直被老闆和同事「老點」。

PS︰迫男友/ 女友剝蝦殼這種事,還是奉勸大家三思!我們所愛的,是頂天立地的人,不是奴隸獸。

延伸閱讀︰
- 不如食自己

- 當老細「阿水」

- 咁做落去,慘過死

- 沒有星星的日子

- 問心嗰句

上載日期︰2014年3月28日


讚好 CTgoodjobs 專頁,獲取更多求職資訊!

以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

Free Subscription

Email