comScoreTag
FancyBox
FancyBox

Workplace Gossip

如果不准po上facebook,還做不做?


賈心潔



facebook feeds
如果不准po上fb,有幾多人願意「寂寂無名」地持續做某些事、愛某些人?
「潔,你係咪真係有咁多朋友呀?」朋友P譏諷小妹經常拿「朋友」做文章。我隨手按著手機開到facebook的頁面,「拿,你睇下,有近800個friends架,一人寫一篇,一星期交一次,都夠我寫足15年有多。」我笑咪咪說。

P望望我的friend list,滿意地點頭。我為著這種理所當然kekee大笑了兩聲。「笑咩?」他問。

「你真係認為呢800個全部都係我朋友?」

最近有網站調查美國近2600人,發現每人平均有671名fb朋友,但真正朋友或常聯絡的卻平均只有18人,佔fb「朋友」不足3%;還有近7成人甚至會與最不想見的人「做朋友」,以作監視之用。

其實有甚麼好監視?世界愈來愈奇怪,例如status update,大家明知道主觀水分居多,卻都可以成為重要的資訊或情報,彷彿一旦放上fb等社交媒體公諸於世,歪理就變真理;相反,不po的話,就一定「無啲咁嘅事」。

「線上線下的人生與人格不一定貫徹」這個信息,不是甚麼創見,亦也許因為已被列入「常識」範疇,所以更被忽略。

今次不出賣朋友,就拿小妹自己為例(實不相瞞,我確實沒有800個真正朋友,交8個出來已經太懊惱了)。我每星期上陶瓷課,出爐的製成品為數不少,然而卻沒有一件能登大雅之堂,而且上堂時大家都專注與舊泥溝通,沒有同學得閒即影即upload,真的一位都沒有。幾年以來,沒有放任何「證據」到facebook耀武揚威來呃like。有次對朋友說起要上陶瓷堂,他一臉難以置信的表情,加標準的審犯口吻問︰「唔係呀嘛,你有學陶瓷架咩?都無見你放過上去fb!!!」3個全形「!」,亦未必足夠表達語氣之重。

我笑笑沒回應。反正不必說下去,話不投機。不過心裡滿足。

如果去旅行不准po、畢業不准po、陪阿媽去飲茶不准po、做義工賣旗不准po……如果不准po上fb,有幾多人願意「寂寂無名」地持續做某些事、愛某些人?

而能夠這樣真心純粹靜靜地喜歡一件事、一個人,是幸福的。

延伸閱讀︰
- EX的現任

- 【寂寞是】一起……獨處

- 【膠論】幫女人挽手袋的男人

- 嫌棄到連打你都費事

- 如無意外,男女可以做朋友

上載日期︰2014年7月25日
讚好 CTgoodjobs 專頁,獲取更多求職資訊!

以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

Free Subscription

Email