【專訪】曾被批賣弄性感 陳偉琪靠「細龍太」入屋進軍荷里活

【專訪】曾被批賣弄性感 陳偉琪靠「細龍太」入屋進軍荷里活
撰文︰陳嘉儀


近年陳偉琪(Vicky)憑處境喜劇《愛.回家之開心速遞》中「細龍太」一角成功入屋,角色潑辣巴渣,配上Vicky生鬼的演技令不少觀眾對她又愛又恨。然而,Vicky將刁蠻小姐演得入型入格,就令不少觀眾將「陳偉琪」與「細龍太」混為一談......

陳偉琪眼中的「細龍太」
「我諗佢(「細龍太」)唔會做嘅嘢我全部都會做。」如要簡單形容「細龍太」,她必然是那種典型的千金小姐,總掛著一副不可一世的嘴臉,在她眼中人人都次一等;而相比這位「十指不沾陽春水」的嬌生慣養富家女,陳偉琪就自言是個貼地「男仔頭」,所有「搬搬抬抬」的粗重功夫對她都不成問題;相反,要在劇中「見人就鬧」才是對陳偉琪最大的挑戰:「我由小至大一同人有啲咩Conflict 就會行開,我最唔識就係同人鬧交!我每次鬧完人之後都會喘氣,有時仲會頭暈,要坐低Recover一陣先得。 」

陳偉琪於加入娛樂圈前曾修讀政治,更為加拿大市長助選。

問到Vicky自己與「細龍太」相似之處,她就認為大家同樣都是女強人,雖然「細龍太」滿腦鬼主意經常想「搞風搞雨」,但背後卻背負著為二房出頭的擔子。於飾演「細龍太」的過程中,Vicky亦嘗試加入自己活潑的一面,希望把角色變得更加立體。她認為隨著劇情推展,觀眾漸漸都對「細龍太」產生了一份同情心:「佢其實好蠢,佢啲奸計差唔多全部都唔Work…...我諗觀眾慢慢都會發現其實佢只係懶醒。」的確,雖然天真的「細龍太」刁蠻又任性,但「惡人有惡報」的諧趣劇情同時又不得不令觀眾為她加上幾分同情分。

入行6年先苦後甜
由2013年因參選香港小姐而加入娛樂圈,觀眾最初對陳偉琪的認識可能只是「大台」某某性感女星,多演奸險嬌嗲的角色。Vicky坦言入行初期觀眾對自己的演出反感,甚至連父母都對自己有微言,但作為新人有Job就要接,她亦唯有盡量做到最好。

陳偉琪坦言入行初期多演嬌嗲角色令觀眾反感。

「其實都好無奈,我都會反省吓係咪我自己做得唔夠呢?或者嗰時我亦都會拎自己同人比。」儘管Vicky初期的付出沒有太大回報,但她仍然繼續努力,憑著「細龍太」一角入屋。近日更於「世界表演藝術錦標賽」中以豎琴、鋼琴、演戲及Modeling的表演獲得獎項,躍身荷里活進行總決賽。提到一直以來的堅持終於可令身邊人見證自己的進步時,Vicky亦不禁感觸落淚,原來收起性感反而最令人眼前一亮,讓觀眾有機會把她看得更透徹,更立體。

支持機構 :The Wave
服裝贊助:Theory

Look out for further updates on our Facebook fan page!

Related Articles

More