comScoreTag
FancyBox
FancyBox

Self-enhancement

【新工伏味濃】5徵兆揭上錯賊船


文:子都



trap
千祈唔好上賊船!

相信有返咁上下資歷嘅打工仔都會明白轉工嘅痛苦:茫茫大海中搵工、面試,返工後適應新環境、新人事、新作風,走出Comfort zone,整個過程要花好多時間同心力。若然一返工即發現上錯賊船,真係喊都無謂。唔想成為連環不幸事件簿嘅主角,就要留意以下幾點:

1/ 長期刊登同一個Job ad
伏喺邊?假如你周不時喺求職網站見到同一個招聘廣告「常客」,咁閣下就要打醒十二分精神!

點解嘅?有機會係間公司內部有問題,以致新人入職無耐就雞咁腳走。面試時最好旁敲側擊試探HR口風,例如詢問係咪因為公司需要特殊技術專才,再判斷搏唔搏得過。

2/ 人人都係新人
伏喺邊?面試時,求職者應該把握機會向面試官打聽前任同事嘅任職年期,若人事多次變動,份工筍極有限。

點解嘅?若打聽到做得嗰1年半載已經算資深員工,反映公司文化、制度、運作模式非常不堪,千祈唔好上賊船!

3/ 有求必應
伏喺邊?每個職位有所謂「行內公價」、「合理水平」,正常公司亦會有預算,所以面試時一定同你傾下薪酬、福利。如果HR乜都無提,對你開出嘅條件有求必應,甚至高出正常水平好多,咁你就要小心。

點解嘅?因為佢有可能係應承住你先,氹你落搭,之後反口覆舌;亦有可能畀多嘅人工係要你負責一啲非職責範圍內嘅事情,甚至從事「踩界」工作。

4/ 老細係外星生物(註:唔是《來自星星的你》嗰種)
伏喺邊?未來老細講嘢1999,明明講廣東話但你都唔明佢講乜,或者無法清楚解釋具體工作內容,咁就有可能係伏!

點解嘅?一係佢表達能力有問題,咁以後做嘢好容易因溝通不良引起誤會、發生衝突;一係佢身為老細都唔知自己部門做緊乜,咁你又點跟佢做嘢?而最壞嘅情況係,呢間公司直情有不可告人嘅勾當,所以佢先對你耍太極帶你遊花園!

5/ 公司瀰漫Walking dead氛圍
伏喺邊?員工狀況反映公司文化同風氣,如果你經過走廊完全唔見有人有笑容,個個垂頭喪氣、滿臉倦容、目光渙散,好似上演真人版Walking dead咁,凝重氣氛瀰漫空中。

點解嘅?唔使講都知係伏!轉工吧啦。

留意番:以上觀點純個人分享。
搵工呢家嘢,是伏是福,最終還是要靠自己過濾、判斷。

延伸閱讀︰
-【被選中嘅細路】見工5招突圍

-開工10大禁忌 早上不應開會

-【in成政府工】AO/ EO闖關攻略

-我在OT之中找到快樂

-【CV已讀不回】4大死因 + 翻生攻略

上載日期:2016年4月13日


讚好 CTgoodjobs 專頁,獲取更多求職資訊!

以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

Free Subscription

Email