comScoreTag
是非,是這樣講的
董德少

gossip
但求不去搬弄是非的同時,亦不要戇居居被擺上枱。

「德少……我頂唔順喇,我要告解……」同事Y可憐兮兮破門而入,我抬頭就看見他鑿在額頭的「罪孽深重」4個大字。抱著「人誰無過」的理念,日行一善問︰「施主,講嚟聽下。」一方面希望溝淡一下他的「罪孽」,另一方面——職責所在。

「我頭先又忍唔住加把嘴,話佢工作分配不均、亂七八糟、嘥晒大家時間……」他說的是某某同事,我亦聽過不少,明知故問︰「重有呢?」

「重有……重有……」Y吞吞吐吐,意味對話終於到戲肉,要說重點了。「我踩多兩腳,話真係頂佢唔順。死啦死啦,會唔會累咗佢?」

是的,在「是非」面前,大概沒有誰能夠獨善其身(就像新界東北發展一樣)。票,未必人人投;而是非,大概無人唔講。

紐約阿爾佛雷大學哲學系教授Emrys Westacott在《一輩子帶著走的實用哲學》中指,從功利主義的角度來看,說是非八卦並非全無益處。簡直菩薩一樣,拯救了不少俗人於水深火熱。

我不全盤否定是非在辦公室的建設性意義,畢竟,適度地批判看不過眼的人事,不失為疏導負面情緒的有效方式之一;而據我個人經驗,八卦大都相當「好笑」,學習以笑料的角度看辦公室不合理的事,對身心的平衡發展不無裨益;而且,從道聽途說的過程中,自能窺見言者與聽者的修養,從而防範應當防範的人。

然而,要強調的是,盜亦有道,講是非要講得正氣,務必謹遵以下原則︰
1/ 以利他為出發點(如本意屬提醒某某慎防中誰的伏)
2/ 不揭人隱私,不在他人傷口上灑鹽
3/ 不無中生有,只說確認過的事實
4/ 不按個人喜惡添加鹽加醋,貶抑或誇大其辭
5/ 不幸災樂禍,亦不落井下石

以Y的工作年資與戲分,實屬「魚毛」級別,我不忍心兜頭潑他冷水說「傻仔,憑你呢種小薯呢三兩句唔經大腦嘅微言,就以為足以左右大局?」之類的話,唯有說︰「咁就當今次係個教訓,下次唔好再咁易被人chok到。」話才說完,我便心虛起來。因為,Y基本上是辦公室內最受歡迎的被chok對象,大家都心知肚明「唔chok你chok邊個?」於是連忙修正︰「就算被人chok,都唔好chok得咁應,你要學識應付。」

但求不去搬弄是非的同時,亦不要戇居居被擺上枱。共勉之。

延伸閱讀︰
- 給80後、90後的公道話

- 爭寵?爭就蠢

- 有一種現實

- 收人皮的最高境界

- 「憎」情剖白

上載日期︰2014年6月23日
Look out for further updates on our Facebook fan page!

Related Articles

More