comScoreTag
有一種現實
董德少
office politics
人事問題,往往比實際工作更難應付。

「喂,少咗個咁嘅?」我明知故問。事實上,稱為「同事」的這個組群,多一個唔多,少一個亦唔少,沒所謂「少咗個」、「多咗個」。

上次問我「返工有沒有朋友」的同事T(來龍去脈,按此),似乎還未想得通——不只跟同事的關係愈搞愈僵,人亦愈來愈冷漠自閉。我嘗試向「被下屬」的一方試水溫。

他們你眼望我眼,顯然已經培養出一種默契。其中同事F答︰「唔係呀,日日都係我地幾個之嘛……我地呢啲小薯。」彷彿暗語一樣,其他幾位同事隨即笑笑和應。

「你地食咩?」我隨便問。反正無論他們答甚麼,我都會說︰「我又係喎,不如一齊。」先旨聲明,並非八卦同事是非(恨不得唔好搞我添啦!),不過既然工作性質是「維持辦公室暢順運作」,小弟真心希望同事返工可以開開心心,以化解矛盾為己任。真的,每人每日困在辦公室至少約8小時,沒有一兩個傾得埋的飯腳,對工作情緒或多或少有影響。

「唔好提佢喇,升咗職之後成個人變晒,而家唔識人啦。」席上,終於有人爆料。人人保持緘默由自可,這些話題一有人「撩開個頭」,就會一發不可收拾。

「唉,佢以前都唔係咁。」「其實佢都知我地好難做,佢以前咪又係做我地啲嘢……」「今日佢入老細房講咗好耐,唔知講咩……」他們一人一句,loop完再loop。當想到他們每日茶餘飯後都翻兜類似的話題與人物,我就連隔夜飯都想嘔出來。

終於明白,T被出局,不一定是他有甚麼致命性的問題。有時候,不過是「劇情需要」而已——某些人的存在而不在場,正好「滋養」一班人的話題,維繫某一種畸型的關係。

人事問題,往往比實際工作更難應付。脫離一些人一些事,反而有益。我慶幸,平時一個人食飯;亦暗自替T高興。

延伸閱讀︰
- 收人皮的最高境界

- 「憎」情剖白

-同事間有種親密,叫「距離」

- 辭職真相

- 【魚蛋妹啟示】女神要食飯

上載日期︰2014年5月26日


Look out for further updates on our Facebook fan page!

Related Articles

More