comScoreTag
FancyBox
FancyBox

人際八卦

「求職」,邊個求邊個?


董德少



HR interview
客客氣氣,好嚟好去,是職場求生的基本原則。
正如現任母親曾經是人地個女;今天的掌上明珠他朝終會成為人地阿媽、奶奶,以至阿嬤嬤;從事HR(人力資源)的同事,KO求職者有時,被HR KO亦有時。畢竟,他朝君體也相同。

「德少,你嚟評下理。啲人嚟見工咁都得嘅?」未見其人,而先聞其聲的同事U事前張揚,霸個靚位,以一派「一定係我啱」的姿態登場。

我望望他笑了笑,不作聲。「做咩咁望住人地?」U一臉無辜,即時從氣燄HR打回原型,變成典型稚氣90後。

「有咩貴幹呢?我地尊貴嘅年輕HR同事。」我提醒U千萬別忘掉自己的身份。

身份這概念很妙,所謂「不在其位,不謀其政」,我們的身份——尤其在辦公室這種階級觀念極重的環境——幾乎決定了我們的高度與深度,包括視野與想法,以至處事態度和方式。當然,初出茅廬的後生仔的處事能力,不見得比老油條遜色,但誰都不能將誰比下去,每個人都有每個人的價值。

「頭先啱啱有個Candidate嚟見HR份工,我叫佢俾工作證明,佢叫我自己上佢Linkedin睇;我問佢Expected Salary,佢反問我而家袋幾錢人工。」U似乎還沒有意識到問題所在。

一句「有個Candidate嚟見HR份工」,極盡身份模糊化之能事。「人地嚟見咩位?」我明知故問。

「HR Manager……之嘛……」U才心虛起來。

「哦……之嘛?」我冷笑一聲。絕對沒有白鴿眼的意思,小弟深深明白絕大部分高層都是由底做起的道理,只是好奇,他作為一名新HR officer,憑甚麼無大無細起來,那個Candidate,雖然叫做「Candidate」,但極有可能成為U的未來老細啊。

「如果我係你呢,就拿拿臨去社交網站research下未來老細嘅資料。同埋,講嘢就客氣啲。」U還來不及反應,我繼續︰「又同埋,做HR嘅就應該要有做HR嘅氣度同專業操守,喺咩情況下都要尊重人,唔係話人地嚟『求職』就當人地低一等。我地何嘗唔係『求才』?」

U呀U,大概你日後都總會去見工,客客氣氣,好嚟好去,是職場求生的基本原則。無論在任何境況、任何職級,都不要忘了對人的基本尊重。

延伸閱讀︰
- 打工仔的30歲前後

- 【4點鐘許Sir】教精打工仔7件事

- 給恨考政府工的K

- 小學雞辦公室政治

- 【劈炮轉行】純粹貪玩?

上載日期︰2014年10月27日

讚好 CTgoodjobs 專頁,獲取更多求職資訊!

以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

Free Subscription

Email