comScoreTag

【港豬傾人工】5大「蝕章」位

【港豬傾人工】5大「蝕章」位
CTgoodjobs編輯部

傾人工,好比一場攻防戰,技巧、策略、鋪排缺一不可。

求職,無非是「求財」的一種手段;而求財的「道行」,反過來亦足以左右求職的成敗。不管是求職者寫CV、見工面試,還是打工仔進行年度評核,甚至純粹希望賺多個錢,自訂身價和傾人工都是最重要的課題之一。

傾人工,好比一場攻防戰,技巧、策略、鋪排缺一不可。既要咁要咁、要點要點(詳見《「R」加人工:必讀!》《求職信、CV搵工 「期望薪酬」填多少?》),求職者及打工仔還要搞清楚「唔好點」,方能穩操勝券。以下5大「蝕章」叫價法,千祈「咪制」︰

蝕章1︰唔知行情
求職者做唔足功課,與市場薪酬趨勢脫軌,不但沒有叫價的基礎,分分鐘被壓價還被迫「硬食」。

補鑊︰按此,即Check身價,兼緊貼市場薪酬行情走勢。做好自我定位,食幾多、著幾多……自己訂。

蝕章2︰死守過往薪酬
HR透露,要求求職者提供「Expected Salary」,並非「價低者得」,而是希望藉此摸清其底蘊——自我評價及對工作的認知。有求職者叻唔切,以為這就是身價的唯一指標,錯失自我表現的機會,兼畀位HR入……「hea加」你一千幾百。

補鑊︰過往薪酬只供參考,求職者宜根據市場、職位、個人專業及經驗,制訂合理的期望薪酬。例如︰現職Executive應徵Manager職位,不妨大膽叫高20%至30%身價;轉行者,或須「張就」一下,知所進退。

蝕章3︰報大數
打工仔想做「肥魚」,搵工跳槽就要靠實力,無得呃。求職者申報過往薪酬時,切忌出賣誠信,天真豬以為報大數就可以為所欲為。只要HR簡單做個Reference Check……立即斷正,貪字就得個貧。

補鑊:大話,一旦說出口就沒有補救的餘地。因此,最好從Day 1開始,就一個都唔講。

蝕章4︰滯留鵪鶉Zone
筍工,某程度上要靠自己打造。求職者若無勇氣突破自己大膽爭取,往後就別抱怨人工低,更不要葡萄人家的高薪厚職。

補鑊:據理力爭!「鵪鶉」絕非優勢,無市亦無價。求職者千萬別因為「淆底」或覺得「唔好意思」,而死守鵪鶉Zone。

蝕章5︰$$$大過天
返工求財是常識,但面試議價唔識轉彎,一味死cher薪酬,而毫不考慮其他福利因素,眼光未免太狹窄了,亦封了自己後路。

補鑊:求職者講價時,千萬別「窮得只剩下金錢」,否則會給人過於勢利的印象,陷入嚴重失分位。建議將假期、福利花紅、晉升機會、學習機會、興趣等一併列入考慮範圍,價位唔到,亦有其他「揸拿」。

延伸閱讀︰
- 【劈炮分手】遞信時應有的對白

- 【睇住呀!】被劈炮5先兆

- 【捉心理】5個職場「升呢」小把戲

- 當你唔再係Fresh Grad……

- 10大 Gmail 實用快捷鍵

上載日期︰2016年3月7日


Look out for further updates on our Facebook fan page!

Related Articles

More