comScoreTag
FancyBox
FancyBox

人際八卦

牆頭草Everywhere


董德少



angry office
不得不承認,牆頭草的生命力比雜草更頑強,他們總會找到一處安身立命,在大多數的庇護下茁壯成長。

「做人有啲立場,有幾難呢下?」同事L激動。每個辦公室,都總有一個半個「火柴人」,一撻就著。我在驚嘆他們的心臟機能的同時,不是不戥他們辛苦的。「做人唔好咁激動,又有幾難呢?」對付激動者最上乘的手段,是以毒攻毒。

「係人唔係,呢頭話咁咁咁轉個頭又話咩咩咩點知最後原來係123……」L說的每個字我都懂,偏偏串連起來就一句都聽不明白,只聽到最後一句︰「德少,你教我點喇!」

「咁佢最後叫你點做,你咪點做囉。」我提議時盡量不帶任何感情色彩,以免觸動L神經的神經,並繼續︰「你咁樣咪就係輸晒囉!你成日咁激動,人地就有把柄係手,係咁倚輕輕改變下心意,就將你激到生蝦咁跳;你有你跳,佢就有佢望住你笑。」

L低頭不語,我繼續︰「好,就算人地大仁大義唔笑你喇,怕咗你喇,嚟安慰你添……」見他想攞綵,我即駁︰「咁咪輸多幾錢重囉。好地地係件公事,可能你有好有力嘅理據去反駁或者捍衛架,不過你一激動,人地不論係收聲定係安慰,件事都會即刻變得Personal同 Emotional。」

不得不承認,牆頭草的生命力比雜草更頑強,他們總會找到一處安身立命,在大多數的庇護下茁壯成長。「唉,咁當係認清某啲人。」L作出最死雞撐飯蓋的掙扎。

「而家你要做嘅,並唔係認唔認清邊啲人,而係學識以平常心去對待每一個人,不要強諸任何期望於他人身上。就好似我而家並無因為你激動而激動,你話邊個佔上風?」

「咁明明係佢亂講我都要認同啦喎!」L講極唔明。

「你當然可以堅持立場,但唔係用呢種態度。我Rephrase你頭先嗰句說話為『如果我咩都認同,咁就無所謂認唔認同喇。』會唔會有效果啲?其實說話內容都唔重要,最重要係你發表嘅時候要從容不迫,就算木無表情,都好過激動,咪當打咗Botox囉。」

L木無表情望著我,我笑笑說︰「就係呢個樣,我Approve你出鱷魚潭。」

延伸閱讀︰
- 詐型有鬼用!

- 「正義之鬧」與「為鬧而鬧」

- 揭「鱷魚頭老襯底」真面目

- 呃假要呃得好好睇睇

- 辦公室不能輕信的10句話

上載日期︰2013年12月2日


讚好 CTgoodjobs 專頁,獲取更多求職資訊!

以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

Free Subscription

Email