comScoreTag
FancyBox
FancyBox

Workplace Gossip

當搵工變成興趣


董德少



CV, 求職, 招聘, 辭職, 轉工, 見工, 面試

recruitment interview as hobby
2014年目標︰心口掛「勇」字,衝呀!

「K真係遞咗信喇,德少。」秘書小姐煞有介事前來向我通風報信。大家都知道,年尾是搵工淡季,流出街的職位空缺較少,而收回來的求職CV亦疏落得多,因此這段時間招聘請人,成本效益較低;老老實實,就是——特別麻鬼煩。

跟K做同事不夠一年,然後快將變做「ex」了。他出年「3」字出頭,大學畢業後一直轉工,今次這一份已經是他第9份工了。其實當初請K,亦不是沒有抱著冒險博一博的心態的;因此如今收到他辭職消息,亦不覺得太突然。

「根據你份CV,最長嗰份工都做唔超過1年,想了解下你點解轉工轉得咁密?」K來見工,我有份in。他當時並沒有搬出天花亂墜的美麗謊言,記憶所及不過說甚麼有機會就多作嘗試,發掘個人潛能之類。而我請他的原因,就是因為他沒有夾硬作故事來取悅我。

後來,正式成為同事之後,我乘機問K︰「可唔可以老老實實話畀我知,你點解轉工轉得咁密?」想不到他竟然直截了當說︰「搵工係我興趣呀。」當下,我狠狠被KO了。

搵工對我來說,是麻煩過被女人問「我同你阿媽一齊跌落海你救邊個先」的事,而竟然有人視之為興趣,不得不認輸。

而K亦很叻仔,每次轉工都話轉就轉得成。這個故事教訓大家,除了「熟能生巧」之外(見工面試,真的可以熟能生巧,今次表現一定要比上一次好,終會見得成。)更重要的是,要成功就要真心熱愛並全情投入去做,自能愈來愈得心應手。可不可以這樣,我就將in人當成為我的興趣?

2014年目標︰做甚麼都可以(殺人放火等除外),只要真心喜歡,就全心全意投入去做。心口掛「勇」字,衝呀!

延伸閱讀︰
- 講錯一句,被唱一世

- 辦公室,有沒有朋友?

- 客戶不比茶水阿姐尊貴

- 牆頭草Everywhere

- 詐型有鬼用!

上載日期︰2013年12月30日


讚好 CTgoodjobs 專頁,獲取更多求職資訊!

以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

Free Subscription

Email