comScoreTag
FancyBox
FancyBox

Workplace Gossip

給老細的話





boss
早前寫咗篇「老細最乞人憎嘅說話」,有好多打工仔都有回應自己嘅心聲,但老細們就有啲微言,剛剛個Weekend朋友嘅Gathering,有位老細級嘅朋友講「都唔知邊條友寫呢篇文,所有同事都Share,話我哋句句說話都係『有組織無目的』,試下你做老細呀!」,佢仲Share 咗好多自己嘅苦況,嗰一刻我當然無出聲話篇文其實係我寫啦,但我都有安撫下佢,其實我都好明白老細都有自己嘅難處。

其實好多時問題嘅根源,並唔係呢句說話入面,而係老細們應該點去「重新包裝」再演繹呢句話。明白到有啲難聽嘅說話真係要由老細把口講出嚟,但如果直接講「乜你唔知返工時間係9:00咩?」,咁樣邊個聽到呢句都一定想講粗口,其實將句嘢換個方式、轉個角度,大家都會開心啲。

1/ 「佢呢幾日做到好夜,今日唔好計佢遲到」
「Official 返工時間係9:00」係人人都知嘅事實,但同事幾點放工,應該唔係個個老細知。真係要責怪啲同事遲到之前,先去HR問問呢位同事之前幾點放工,其實同事成日OT夜走,某程度上老細都有少少責任。

唔好以為一個細少嘅Task其實好簡單,但只要有好多好多個細少嘅Tasks就足以令我哋OT到夜晚11點。同事因為太忙而間唔中遲到,如果做老細能夠走去同HR講一句「佢呢幾日做到好夜,今日唔好計佢遲到」,老細輕輕呢一句話,相信你會立即變成眾人嘅英雄,一句話換來同事無比嘅信任,我覺得值過你扣佢幾十蚊遲到錢。

2/ 「大家一條Team,一齊死掂佢」
工作出錯係人都會有,亦無人想孭鑊,如果真係「我唔理,你同我死掂佢」,最尾就算解決到件事,亦無同事會服你。做得高層,一間公司或一條Team嘅頭目,就算係邊個同事出錯,都要有孭鑊嘅準備,呢啲高層人工包埋。出事嗰一刻並唔係問責嘅時候,快快脆脆決解件事先係首要嘅任務,「大家一條Team,一齊死掂佢」呢一句不但盡顯你有大將之風,亦能夠團結同事、係危機時穩定軍心。Settle 咗件事之後,再慢慢問責都未遲呀。

3/ 「為你來年升職做好準備」
公司賺幾多、蝕幾多,基本上同事都會心中有數,呢啲嘢好難呃,而且打工仔心態係「唔理你賺/ 蝕幾多,最緊要係我今年加幾多」,OT 咗一年,如果最後只係得到一句「今年無人工加」,堅係好Hurt。大部分打工仔工作目的只有兩個,「錢」同「開心」,如果唔能夠滿足「錢」嘅需要,老細其實可以諗諗「開心」呢一Part(當然,有啲打工仔會覺得錢就係佢開心嘅泉源),「開心」可以係工作環境、有無嘢學、工作機會、福利津貼等等,換一換個角度,今年雖然係無人工加,但畀佢哋一啲錢都買唔到嘅機會,可能仲開心(希望係)。

一位好老細除咗識得賺大錢之外,就係要懂得體諒同欣賞,作為一個好嘅Marketer,如果能夠將說話包裝一下先出街,從問題中搵出機會,令同事更加Buy 你、服你,咁先會有一個好團隊。

原文刊於我做Marketing Fb專頁,獲授權轉載。

延伸閱讀︰
- 老細最乞人憎嘅說話

- 老細,不如你試下住屯門丫

- 【同腦細講數】加人工從何說起?

- 【老細忽然變臉】10大原因

- 5大職場悲劇︰上班族最怕與老闆成為fb朋友

上載日期︰2016年5月3日


讚好 CTgoodjobs 專頁,獲取更多求職資訊!

Free Subscription

Email