comScoreTag

老細最乞人憎嘅說話

老細最乞人憎嘅說話

boss
每日返工十幾粒鐘經已係超勁爆辛苦,如果再遇著啲乞人憎老細,喺你OT 時埋嚟講啲難聽過粗口嘅說話,真係有衝動一封Resignation letter車埋去然後走人。當然你唔會咁做,因為膽小嘅打工仔怕手停口停,所以你頂多會好禮貌地回佢一句「明白嘅老細,無乜事我繼續OT先」。以下咁多句,你又聽過邊幾句呢?

1/ 「你知唔知 Official 返工時間係9:00?」
對於一啲懶到出汁嘅人嚟講,聽完可能無乜Feel,但我地呢啲真勤力嘅同事一聽到呢句嘢真係想死。星期一至五日日都做到夜一夜先走,只係有一日遲咗15分鐘返工,你就Remind我Official hour係上午9:00。

咁等我都Remind 你一句,其實Official 放工時間係18:00呀!(真係見有人咁同老闆講過,之後我就再無見過呢位同事喇。)

2/ 「點解成日要OT? OT係代表你工作效率低」
呢句嘢仲難聽過粗口,之後再加一句「唔係話你OT唔勤力,不過你做嘢唔夠快囉」,咁點先叫快?快得過老細就叫快,但當你快過佢時,佢就會加多啲嘢畀你做,令你工作效率再低啲。

老老實實,我地係無 OT 錢架,所以我地OT其實係因為「責任」,其次先係因為「勤力」。所以你見我 OT 時,除咗Appreciate一下我地對公司嘅「責任心」,記得畀返啲補水喎!

3/ 「我係對事,唔係對人」
講得呢句嘅人,心入面都有一個「前設」,前設就係「你都覺得自己係對人唔對事」,所以你先要講呢句去澄清,好似會令自己同對方都好過一啲。

表面上呢句嘢好似好成功,但其實你一講出口就已經代表你有問題,之後你所講嘅每一句話都係唔需要再聽入耳,因為你係「對人講」唔係「對事講」,而嗰個人就係我。

4/ 「今年公司蝕錢,無得加人工」
唔知從何時開始,老細當「賺少咗」等同「蝕錢」,「到Target」等於「40分剛剛合格」,有時覺得呢句說話某程度上係等於「你不如辭職罷啦」。但作為打工仔,每年除咗等「打8號風波」之外,最抱有希望嘅時刻就係Annual review加人工,如果老細們今年真係「蝕錢」,請不要熄滅我地嘅「希望」。

5/ 「我唔理,你同我死掂佢」
做得最耐嗰個又係你,最有經驗又係你(應該係),間公司就算唔係你,相信你都一定有份。平時乜都唔理都算,家下發生咗大鑊嘢你又即卸,其實有無諗過大家都唔理嘅時候,最終出事嗰個都係你。所以不如大家一齊做個好同事,一齊死掂佢啦!

通常老細講啲好 Hurt人嘅說話時,一係就係無經大腦嘅情緒發洩,其次就係想表達啲極有深度嘅內容,只係我地層次太低聽唔明背後嘅意義。兩者都有一個共通點,就係多數呢啲對話都係無建設性之餘,仲帶點破壞性,另一個角度睇係一種黑色幽默。所以下次如果再聽倒呢啲無養份嘅說話時,千祈唔好唔開心,只要大家繼續努力OT,以微笑回應一下老細,心諗呢個「黑色幽默」人工係包埋嘅,咁樣大家都會長命啲!

原文刊於我做Marketing Fb專頁,獲授權轉載。

延伸閱讀︰
- 【劈炮被挽留】老細邊句話能令你留低?

- 老細,不如你試下住屯門丫

- 【被炒魷】遣散費點計?

- 打工仔6個被炒理由!勿以為黑面好有型

- 【新工伏味濃】5徵兆揭上錯賊船

上載日期︰2016年4月26日


Look out for further updates on our Facebook fan page!

Related Articles

More