【職場熱話】地鐵站行十分鐘好遠?求職者因公司「遠」拒絕見工

香港道路交通擠塞問題嚴重,不少打工仔選擇港鐵作為上班的公共交通工具,以避免道路出現突發情況導致返工遲到。不過,鐵路不像巴士般可以在隔個街口設有另一分站,乘客往往要走些路才能抵達目的地。最近,有自稱HR向社交媒體專頁「奴工處」以「見工嫌遠」為題投稿,指有求職者因公司遠離港鐵站而拒絕面試機會,但所謂的「遠」只是十分鐘步程,隨即引來往民熱烈討論。

延伸閱讀:【區區打工仔】怨葵涌係全港最差返工地點?打工仔反駁︰美食天堂

即睇事主分享及網民回應:(按圖了解)
  事主:想約見一位求職者上嚟公司見工,約好時間之後佢問我公司近唔近地鐵站,我答佢10分鐘路程,佢即刻好大反應:「吓?咁遠?我上網睇係見你公司喺地鐵站隔離先申請咋!」我答佢:「咁我哋cancel呢個interview。
」我心諗,你學識咗點睇Google map先再搵工吧!
網民:最好喺屋企隔離。
網民:叫佢做屋企樓下個保安。
網民:佢應該搵份工喺地鐵站入面返嘅,咁咪解決咗個問題囉!
網民:時代直達地鐵站,但個奪命隧道都玩10分鐘。
有些網民分享個人經歷,招聘廣告及實際地址可能會有不同,甚至見工及工作地點是不一致:
網民:見過有公司ad明明話紅磡,但係其實係土瓜灣。
網民:試過ad寫中環,見工去到葵芳。
網民:之前見過份工,喺地鐵站隔離,點知最後同你講,返工地方喺後幾條街另一個office。
 

另有網民支持事主約見的求職者,更表揚他老實:
網民:成十分鐘都叫地鐵站附近,你都傻嘅。
網民:迫完地鐵仲要行10分鐘,嫌遠有乜問題?
網民:咁都要開post,老闆都知你請唔到人喇。
網民:逆向思維諗,呢間公司應該唔多吸引,否則山長水遠都會有人嚟in。
網民:講清楚要求咪幾好,費事見遠浪費大家時間。
網民:都幾老實呀,一齊工作都唔需要猜度!
做好資料搜集最重要
公司距離車站近,當然是件好事,但有網民認為求職時應要有做足功課,以免實際與期望有落差,不過另有網民留言指「返過九龍灣既表示問多句無壞」,認為某些地區的工作位置應該要問清楚。

延伸閱讀:【職場熱話】喺九龍見工最後竟然要返大西北?打工仔:而家啲公司好古惑
延伸閱讀:【區區打工仔】網民大數火炭返工四大慘況 連一架過海巴士都無?
延伸閱讀:【返工血淚史】終點一世也未到 大數五個遠到爆的港鐵出口
Look out for further updates on our Facebook fan page!

Looking for jobs?