自4歲患小兒麻痺 憑毅力成裝修師傅:「我哋都可以有貢獻」

自4歲患小兒麻痺 憑毅力成裝修師傅:「我哋都可以有貢獻」
撰文︰陳嘉儀
做裝修少不免「爬上爬落」,裝天花、拆地板、鋪泥水......對常人而言這些工作已不簡單,而對小兒麻痺症患者來說,要「卑躬屈膝」完成如此消耗體力的工作更似是天方夜譚。現年42歲的黎國威(下稱:黎師傅),自4歲起罹患小兒麻痺症,由於肌肉萎縮以致不良於行,卻憑著無比毅力成為工程公司的合伙人,落手落腳承接每單裝修工作。



黎師傅雖患小兒麻痺症,但工作絕不假手於人。

「派傳單、洗碗乜都做過」
黎師傅與朋友合伙經營工程公司已有兩年,專門承接各種家居設計、水電工程、翻新裝修等工作。入行前的黎師傅可謂「百足咁多爪」,試過從事俗稱「洗樓」的工作,於工廈走遍每層派傳單;亦曾於茶餐廳後巷當洗碗工。「以前隻腳未裝腳架,行動起上嚟無咁方便,好多僱主都唔欣賞,所以好多工都係做咗一陣就無做。」黎師傅表示因為肢體上的障礙,加上只有中學學歷,令他於就業方面受到不少阻礙,工作初期多被僱主拒諸門外。

修理水電、全屋裝修都是黎師傅的日常工作。

「其實我心目中一路都想做室內設計,好彩喺2001至2002年經朋友介紹可以喺廣告公司做。啱啱開始乜都唔識要由低做起,慢慢學點用啲電腦軟件:Excel、A.I.、Photoshop.....」於廣告公司工作的十多年時間增加了黎師傅對平面設計的概念及經驗,他更額外考取水電牌資格,從事水電維修;隨後又修讀了兩年地產,甚至連職業訓練局的短期課程亦幾乎全部讀報過。雖然黎師傅學歷不高,但卻以毅力搭夠,彌補知識上的缺口,說不定比一般打工仔還更博學。

乘公共交通工具挑戰大 社會仍有進步空間
除了就業上的困難,小兒麻痺症對黎師傅的日常生活亦造成不少影響。打工仔每天上班「迫巴士」、「迫地鐵」都已經夠磨人,對平衡力不佳的黎師傅而言,每次出入都要比常人更花時間,亦要避免與途人碰撞。他更道:「一次半次企下唔辛苦,但日子一耐,腰會酸軟,膝頭關節都會磨損,我仲試過因為對腳無力跪咗喺地。」此外,黎師傅安裝於右腳的不袗腳架亦不時出現零件老化的問題,多年前他就曾經因為腳架配件鬆脫而被支架插中大脾,受傷之餘,本身的行程亦無奈要被迫延誤。

因為肌肉萎縮,黎師傅右腳須安裝腳架,亦須穿著特製工作鞋。訪問當日腳架出現零件鬆脫的問題,幸好黎師傅有隨身帶備零件替換。

然而黎師傅並沒因為生活及工作上的不便而自怨自艾,他坦言:「其實自己算好㗎喇,唔洗坐輪椅。最緊要係唔好覺得人地睇你唔起,唔好覺得自己比人差。」言談間黎師傅雖然說得隨意,但能夠將過去的「歷練」看得雲淡風輕,不其然都感受到黎師傅內心的強大及自信。他更謙虛表示:「能夠出嚟社會工作唔係靠自己,我自己係個好軟弱嘅人,都需要靠朋友同社會支持、幫助、鼓勵先得。」

對於社會給予傷健人士的支援,黎師傅認為:「(支援)夠就肯定唔夠,但比以往好咗好多,當然仲有好多進步空間。」他指近年交通工具及公共設施明顯多了很多扶手、升降機、車位等;而社會不少商業機構都開始聘用傷健人士,協助他們就業,代表社會大眾願意接納及認同傷健人士的能力。黎師傅更強調無論是傷健、 失明或聾啞人士,其實他們的能力都無受限制,只是大家的長、短處各異。如果社會各界可以消除對傷健人士的誤解,其實傷健人士一樣可以貢獻社會。

攝:陳嘉儀

Look out for further updates on our Facebook fan page!

Related Articles

More