comScoreTag
FancyBox
FancyBox

Job Market Gossip


Job Market Gossip

論盡辦公室八卦,同一眾打工仔秒殺公司內人情世故、蜚短流長,做個稱職 career man / career woman。宗旨︰懂得做事,亦要懂得做人。


衰老細4大作用


文:子都



幾乎每間公司都會有個衰老細,正如空氣中必定存在病菌。雖然佢地無疑係社會毒瘤,但如果廣大打工仔能夠抗衡佢,其實佢都能夠為大家帶嚟正面影響。學Friedrich Nietzsche話齋:「What doesn't kill you makes you stronger」。

1. 團結下屬
衰老細其中一個特點就係乞人憎,而乞人憎嘅人往往會係眾矢之的。當所有同事都非常唔妥個衰老細,大家就有一個共同敵人,既然坐埋一條船,自然守望相助,同仇敵愾,槍口對外。你會發現衰老細手下通常有一班十分團結嘅員工,有時關係直情好到做乜都一齊。例如公司食飯,衰老細坐嗰枱勁多吉位,其他枱就多人到要加櫈;一班同事傾偈傾到興高采烈,衰老細一出現全部人同時收晒聲,合唱團都無咁夾。

2. 訓練員工耐性
衰老細又名腦細,佢哋離地、缺乏common sense以及基本生活自理能力,所以員工每日同佢哋相處,都係對耐性嘅訓練。相信唔少人都遇過唔識中文輸入法嘅老細(留意返,其實中文係香港法定語文而佢唔係外國人),搞社交網站或網上媒體但唔識用facebook、instagram(留意返,其實facebook出咗13年,已經out out地,instagram都出咗6年),小生仲聽過有腦細搭搭吓車發現唔見屋企鎖匙打畀員工求救,叫員工幫佢哋屋企訂蒸餾水,兼且幫佢隻狗約獸醫打針……莫講話流落荒島,佢哋連喺城市都生存唔到。

3. 提供笑料、金句
之前講過,腦細個腦特別細,有啲甚至疑似腦部功能殘缺(簡稱腦殘),由此衍生好多笑料、金句,經常令員工忍俊不禁,為沉悶嘅工作帶來無限歡樂。例如曾經有火爆腦細公然用粗口辱罵員工,該員工基本上已習以為常,聽到麻木,無表情無反應由佢發癲,點知峰迴路轉,個腦細自己鬧人鬧到喊!被人鬧嗰個都未喊,佢喊乜呢?其他人一路做嘢一路食住花生等睇戲,簡直係Highlight of the day。

至於金句,亦係句句精警層出不窮,最經典莫過於「我覆咗個Email唔代表我睇咗」、「我唔係針對任何人,但你XYZ*(^%^$*^)」、「我唔知點,總之你搞掂佢」(英文版:I don't know how, just make it happen),真係聽到眼都費事反。

4. 成為反面教材
衰老細,通常都係老屎忽,個屎忽黐住公司少則十幾年,多則幾十年。由於個人無乜料又不思進取,所以無論佢人緣幾差,或份工幾無聊幾惡啃,佢都只可以喺現職公司獻世,根本無能力搵到第二份工或有任何事業突破。當你望住佢,你就會深深體會到何謂生無可戀、行屍走肉,時時刻刻提醒你,千祈唔好成為好似佢咁嘅可憐蟲。


讚好 CTgoodjobs 專頁,獲取更多求職資訊!

以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。

Free Subscription

Email