comScoreTag
FancyBox
FancyBox

Resignation

裸辭不是罪





管理層係時候需要改變「裸辭或頻轉工一定係負面行為」呢個諗法。

做Screening睇到求職者曾經裸辭或頻轉工,HR一定會充滿疑問,印象唔多唔少打個折扣,但絕對唔會因為咁就斷然篩走。近日見到網友提到有位HR主管要求請人時,篩走有「空窗期」的求職者,同事仔都坦言做法過分。

裸辭有各式各樣嘅原因,可能係健康出問題、要照顧屋企人,去工作假期,又或者係而家份工非常唔適合自己。對於「空窗期」者,傳統管理層最常擔心嘅係對方會同市場脫節,「佢唔緊張有份工喺身咁即係想hea啦!」呢班管理層係好需要改變「裸辭或頻轉工一定係負面行為」呢個諗法,唔好咩都一廂情願。

作為一個親歷裸辭嘅人事部員工,貿然離開職場肯定係一個顧慮重重嘅決定。零收入無得畀家用,屋企經濟或者積蓄夠唔夠嚟緊嘅開支?而另一個切身問題係,自己做HR請人都知,有「真空期」始終感覺唔完整,見工時HR一定追問,如果大部分公司嘅老闆都唔願意接受任何裸辭原因,咪會嚴重影響前途?

有啲情況真係迫於無奈講拜拜嘅,照顧家人或者身體有事,可能最少有半年時間暫離職場,當你處理好問題想重新出發,要有定心理準備由低一級做起。對於工作上嘅期望不妨嘗試同僱主Deal,叫得你嚟見工,多數唔介意你有過「真空期」,反而更著重面試時所表現嘅工作態度。如果你之前有相關工作經驗,可以畀僱主知你有能力盡快Pick up新工作,將來有升職機會時希望佢優先考慮你,呢一份小野心,反而增加咗僱主對你嘅信心。

而我嘅小故事係因為頂唔順工作上嘅不公,兼被上司玩,足足忍咗一年等CV唔好太難睇先走。未試過返一份工係日日去到樓下就想掉頭返屋企,我個男上司好鍾意精神虐待人,文件打錯一粒字佢改完會畫花晒先畀返你,搵你永遠係拎萬字夾掉你或者一腳踢椅背,試做新嘢有唔明只會答你「叫你咁做就照做啦,趕時間呀!」,仲要間唔中幫佢買早餐或者落街買零食。我唔係做私人妹仔,工作上完全學唔到嘢,難怪有同事話我已經係捱得最耐嗰一個。

男朋友唔忍心見到我日日苦瓜乾嘅樣,當時佢建議反正我只係做緊Junior post,人工少,裸辭嘅成本其實好低,就算要搵返同樣嘅Post再做都唔難,身心健康要緊,所以支持我裸辭。

當你騎牛搵馬成功,新工Offer到手,遞信係幾咁輕而易舉嘅事,同事們仲會讚你勁、戥你高興。不過,亦有唔少打工仔有裸辭念頭已經自覺係罪人,唔想同朋友傾,唔敢話畀屋企人知,只有默默承受壓力。明知咁痛苦都要鼓起勇氣做,好明顯唔會係純粹「畀自己唞下」咁簡單。作為老闆或者HR,要諗清楚想請咩人,Jumpy同「真空期」又代表到啲咩呢?唔通夠Stable就實係傑出員工?

裸辭唔應該係禁條,做得HR就要客觀啲,係咪人才唔係你同我輕易睇得出嘅,只要符合到要求,點解人地唔值得一個面試機會?唔會個個咁好彩好似小熊咁有男朋友諒解,有朋友裸辭咗就被身邊嘅人標籤無用、無能力要靠屋企嘅廢青,好快就一蹶不振。打沉一個年青人又對社會有咩好呢?HR唔該客觀啲,畀正確嘅Advice老闆點樣揀人最有效率、最啱公司用,而唔係巴巴閉自己唔Like就大晒。

原文轉載自HR熊 - 職場航行日誌fb專頁,獲作者授權轉載。

延至閱讀︰
-【裸辭?】首先,你要有個Package

-【臨急抱佛腳】面試備戰4懶式

-【發放仙氣】5.5招吸HR搵上門

- 【起你個底】被HR篩走5原因

- 【OL日誌】返工前裝身8大煩惱

上載日期:2016年5月31日


讚好 CTgoodjobs 專頁,獲取更多求職資訊!

Free Subscription

Email