comScoreTag
見工面試演技派
董德少
acting during recruitment interview
見工面試時,當被問到「你有何理想?」……

公司最近請來一名新丁Y仔,交由我照顧。一見面,他劈頭就拋出一句「請多多指教!」劇味十足,在職場打滾多年,我從沒說過這句話,亦不見得有其他同事會講,通常在翻譯成廣東話的日劇中聽得最多。

循例認識新同事,「Y仔,點解你想入嚟我地公司?」我問。他竟然放空o嘴,我還以為是我問錯了如「份糧夠唔夠供樓?」或「你點睇中學生應否談戀愛?」之類的多餘問題。時間靜止兩分鐘,我靜觀其變,他終於開口︰「嗯,其實我唔太確定,不過我想入大公司。」

之後,放空o嘴的是我,腦裡只夠RAM追問︰「你見工時都係咁答?」(我想搞清楚HR在搞甚麼。)「唔係,傻咩!如果咁答我今日就唔會喺你面前。」如此,HR請他就變得非常合理了。

「咁你當時答咩?」「無咩架,咪講下公司理念使命,然後就話同自己嘅理想同事業發展方向好吻合,然後講下自己可以有咩貢獻之類嘅行嘢,都係呢啲啦。」醒目仔。

「咁你嘅理想係咩?」對於自己對這後生仔的高度好奇,令我自我感覺非常良好。「我應該答上位做本集團大中華區總裁,定係要答食大茶飯?」他的確非常討我歡心︰「我想你答心嗰句。放心,公司都請咗你返嚟咯。」

「嗯,想打份工開開心心,心安理得做自己鍾意嘅嘢;份糧夠畀家用兼養得起自己;每年放兩三次五日以上長假去旅行。」

真的,世上並沒幾多位符合社會高度期望的「成功人士」,與其野心勃勃空談所謂理想,倒不如腳踏實地,做好自己。「打份工開開心心」是最實踏,亦是最奢侈的理想。

延伸閱讀︰
- 「頂」老闆6訣

- 俾人恰到上心口

- 睇新同事「唔順超」?

- 如果唔使成日開會……

- 骨氣定量地?

上載日期︰2013年8月19日


Look out for further updates on our Facebook fan page!

Related Articles

More