話唔做話走，講左3年

人總不能明明想離開，卻一直原地踏步、賴死唔走。

「我唔做架啦。」是偽草裙舞同事B的口頭禪，我足足聽了3年。不好意思用個「蠢」字來形容他，畢竟以年齡和職場經驗計，「前輩」這個名銜他當之無愧。佢食鹽多過我食米，無誤。我只能說是相當「低手」。

的確，「魚唔過塘唔肥」這個說法具有一定有效性，而個人的競爭力與自信亦有一部分是建基於「走得郁」的能力的。不過，留意番，「過塘」與「走甩」都是動詞、都是實際行動，而不是得個「講」字。

B這樣事先張揚，無疑成事不足，敗事有餘，甚至得個弄巧反拙。即係咁︰

1/ 這實屬真人版《狼來了》的完美演繹，不是不具深刻教育意義的，應引以為鑑。

2/ 自暴其短，「我唔做架啦」說得愈多愈久，愈成為「我走唔郁」的有力鐵證；愈走唔郁，老闆愈不當你是一回事。

3/ 最大件事的是，這樣做無異於親手削弱自己的Bargaining Power。第1次講——豪畀你，當閣下超級做得嘢，就當公司真係無咗你唔得（當然，實際上絕對唔會有啲咁嘅事）——公司和老闆或多或少有點擔心，擔心失去得力員工會「拿手唔成勢」。慌忙半秒，老闆的本能反應是「取而代之」，著手做好兩手準備，務求同步過冬，安然過渡。都說，這個世界沒有誰沒有誰不行。

「其實，你係咪已經有咩打算？有嘢幫手即管開聲，幫到一定幫。」我苦口婆心，跟B打開心窗。

B一臉錯愕，問︰「打咩算？」他果然聽不明白。

「你話唔做丫嘛，相信你都計劃咗一段時間，我對你有信心。」我望著他笑一笑，希望他不會覺得「有骨落地」。

B點點頭，低頭2秒，又抬起頭說︰「我做埋啲嘢先。」

我真心希望B真係會「做嘢」——努力做好手上的工作，證明自己的價值也好；決心著手為「我唔做架啦」作好準備也罷。人總不能明明想離開，卻一直原地踏步、賴死唔走。

延伸閱讀︰
- 8種務必「企硬」的狀況

- 好人是如何變衰的？

- 職場8件一早明白、最好不明的事

- 新工人工低過而家，走不走？

- 畀次機會呀，老細……

上載日期︰2015年6月8日