comScoreTag

【諗清楚】簽約前撫心自問4件事

【諗清楚】簽約前撫心自問4件事
文:子都

喺幸福面前依然要停一停、諗一諗,唔好因為過去工作經歷太坎坷就抱住一顆「恨嫁的心」。

阿愁早兩日問我:「我收到某某大公司Offer,月薪$X萬,你話我要唔要好呀?」

恭喜,呢個絕對係一個「幸福嘅煩惱」,但喺幸福面前依然要停一停、諗一諗,唔好因為過去工作經歷太坎坷就抱住一顆「恨嫁的心」,唔理三七廿一Lur飯應。小生嘅回答係:

「呢個係只屬於你嘅抉擇,任何人都無資格話畀你聽應該點做,包括我。無論建議你要定唔要,都係不負責任嘅講法。反而你自己應該喺做決定之前,撫心自問以下幾個問題,去衡量呢份工究竟做唔做得過。」

1/ 我真係想做呢份工?
好多求職者鍾意採取漁翁撒網嘅方式,將CV 寄去一堆公司、有得面試就幾歹都去一去,有Offer就試吓先,唔啱再搵過。但不斷轉工一方面影響仕途,另一方面浪費你自己同對方公司嘅時間。不如簽約前先搞清楚合約內容,了解要履行嘅職責、評核機制、薪酬福利,以至公司環境、文化等各方面係咪符合自己能力同期望,免得轉來轉去得個吉。

2/ 大家嘅理念、價值觀是否一致?
「理念」同「價值觀」聽落似乎虛無縹緲,其實深深影響我地生活。假如你支持LGBT平權,但未來僱主係極端保守派組織;假如你係黃絲,但未來僱主同建制關係密切;假如你係環保人士,但未來僱主係皮草商、建造商、石油供應商……你嘅工作就會日日同自己良心過唔去,你覺得,得咩?勉強無幸福,放手吧啦。

3/ 新工作是否充滿樂趣、挑戰和發展空間?
「學唔到嘢」、「做落好悶」、「無得升」係唔少打工仔萌生去意嘅原因,但新工作又係咪充滿樂趣、挑戰同發展空間?一份工要做得長,成功感同滿足感非常重要。接Offer前務必了解工作內容同人手架構,確保自己在職期間能夠不斷進步、累積經驗,以達成個人事業發展目標。

4/ 新工作能否配合生活模式?
人生有好多嘢要兼顧,健康、家庭、朋友、精神追求等等等等,工作只係其中一小部分,所以工作必須能夠配合生活模式,才能持久。如果新工作需要經常OT、工作地點離家甚遠,但你非常珍惜同家人、朋友相處時間,喜歡在晚間進修、參加興趣班,呢份工就會打亂你嘅生活模式,阻礙你追求其他對你而言更重要嘅事務,你會開心咩?唔開心,辭職只係遲早問題。

點呀?而家有無些少頭緒?
總之,要記住:工,沒所謂熱門、冷門,只有適合不適合。

延伸閱讀︰
-【嬲嬲豬】怒數公司10宗罪

-【辦公室政治】攻防6式

-【同腦細講數】加人工從何說起?

-打工仔每日浪費幾多時間搭車?

-【求職信】5招砌掂Email 主旨

上載日期:2016年3月23日


Look out for further updates on our Facebook fan page!

Related Articles

More