comScoreTag

【迎新】職場新丁專屬4武器

【迎新】職場新丁專屬4武器
文:子都

新人身分其實係一種「特權」,一旦做得好、做得啱,就能為職涯打好基礎。

正所謂「新嚟新豬肉」,任何年代嘅新人(包括Intern仔)初入職場,總會被指派負責瑣碎工作,碎紙、影印、接電話,甚至被前輩(老屎忽)恰。面對呢啲情況,大部分人都會有感自己不受重視,甚至覺得學唔到嘢、前景堪虞。

的確,新人階段未必接觸到公司業務嘅核心,但正如打RPG一樣,主角初登場就算係Lv 1都有專屬武器,新人身分其實係一種「特權」,有啲嘢係新人先做得,一旦做得好、做得啱,就能為職涯打好基礎,準備隨時上位!

特權1:問題天天都多
你係新人,老細、同事就預咗你乜都唔識,所以可以盡量發問,唔使覺得唔好意思。唔少老細寧願你咩都問,好過你咩都唔問但最後做錯哂。另外,老細見你肯學肯做,自然對你好感大增,覺得呢個後生仔女係可造之才。

特權2:犯小錯
新人時期犯啲小錯無傷大雅,甚至有助職場發展。新人全無實戰經驗,犯錯情有可原,只要你表現出對工作嘅熱誠,勇於認錯並承諾改正,通常都會獲得原諒。而且,人之患在好為人師,好多老屎忽之所以恰新人,無非係驚你威脅佢地位,佢要擺姿態,顯示自己嘅重要性。

你犯錯等於示弱,佢就會覺得你無能力威脅到佢,會比較容易接受你;你犯錯後再虛心求教,佢會以為自己好有料好識教人而飄飄然,知無不言言無不盡,你可能可以從中得益。

特權3:碰釘兼行冤枉路
對業務唔熟悉嘅新人,經常付出10分努力,最後只得到5分成果。呢啲看似徒勞無功嘅努力,其實係成功嘅過程同養分。世界上無「無用」嘅經驗,你永遠唔知你今日呢份做得好辛苦但被個客ban咗嘅Proposal,會唔會成為下一個Project嘅參考資料;又或者你被迫出席一個又悶又走唔到嘅商業活動,會唔會識到一個Potential大客。

特權4:天馬行空
資深員工最大問題係惰性,因為太熟悉業務而不知不覺墨守成規,培養出一套自己做嘢嘅方式、對行業嘅既定概念,難以改變,令經驗反成負累。新人勝在對行業一無所知,自然可塑性高、想像力強,可以提出好多天馬行空嘅創新建議,拓展更多發展空間。

編輯仔留言乜乜乜:講咁耐,其實以上770粒字都只不過係一個局(好似係)。如果你係應屆畢業生/大學生/大專生,咁我地實在太有緣喇!順個便用3分鐘#為自己發聲,一齊完成埋我地份定情信物,好無?

延伸閱讀:
- 裸辭不是罪

-【臨急抱佛腳】面試備戰4懶式

-【發放仙氣】5.5招吸HR搵上門

- 【起你個底】被HR篩走5原因

- 【OL日誌】返工前裝身8大煩惱

上載日期:2016年6月13日


Look out for further updates on our Facebook fan page!

Related Articles

More