邊個話讀冷門科無前途?

邊個話讀冷門科無前途?
文︰魏民菁

大熱可以倒灶,黑馬可以爆冷。打工讀書也好,重點取其心態。

有人認為入到大學「你的學科如何,你的命運也必如何」,讀醫、讀BBA、讀Law嘅同學仔,齋睇個牌面都已經贏晒。但事實上,讀冷門科嘅一樣可以羸在起跑線,甚至終點前。

「喂!你唔係呀嘛!有BBA唔揀揀讀中文系?」

「咁鍾意讀咩就揀咩㗎啦。」

「咪傻啦!BBA先最搵到食。讀language最多咪做教書佬。」

相信以上的對話,大家都耳熟能詳,即使唔係出自你屋企人把口,身邊啲姨媽姑爹都會勸你「回頭是岸」,但重點是︰BBA根本不是一個岸。舉個例,當每個準大學生為「錢」途而不是興趣去盲追商科,最後導致畢業市場上有一大堆商科人,如果自問成績麻麻,隨時待業又待業,甚至最後同其他科的fresh grad爭工做。

以下3句,下次思考完再講︰

「讀中文咪教中文、讀英文咪教英文囉。」
點解商科咁受歡迎?好簡單︰搵到錢。望住文學院嗰班「書呆子」,十個有九個都認為嗰股「文人風骨」味是不能當飯食。

有人會認為讀語文系有好多工都做得,唔夠專,競爭力同阿源一樣,都係零。但你又有無諗過,語文能力喺職場嘅重要性?打email、寫report、砌proposal、甚至度條tagline,講求嘅都係文字功力。

「歷史同哲學根本就係乞食科。」
「讀歷史?」「讀哲學?」
「傻的嗎?」
「咁你遞日靠咩維生呀?30歲人仲食阿爸住阿爸?」

即使閣下出盡洪荒之力解釋再recap,點都唔會敵得過班親戚頑強嘅信念:喺佢地眼中,你只係一個思想古怪、日日淨係識懷緬過去兼且無賺錢能力嘅廢青。

講到懷緬過去,香港人或多或少都會諗起英國。其實要做英國「話事人」(即係首相),原來都要有相當嘅文化背景。根據資料顯示,過去大部分英國首相都係讀歷史或PEE(Philosophy, Politics and Economics)(哲學、政治、經濟)出身,當中包括帶領英國走出二戰陰霾嘅邱吉爾、前任首相白高敦、卡梅倫等。

歷史同哲學有助培養宏觀思考,亦可融會貫通至其他範疇,對管理非常有利。有歷史知識,處事不會重複犯錯;有哲學思維,能對一件事有多角度思考,兩者不論對職場處事或個人修養,都有一定幫助。

「下?你呢科即係讀咩?」
文科生在職場上經常被指競爭力不如人,其實大學裡頭仲有一堆世人難以作職業界定嘅冷門科,例如宗教研究、社會學、藝術及化學等。一般人對上述科目認識不深,於是衍生出各種謬誤︰

- 主修宗教研究、音樂或宗教等學科的學生會成為哲學家、音樂家或神父,否則做老師;
- 商科生賺錢能力高;理科生將來做科研;文科生只會寫作及教書;
- 讀咩科都好,最好打政府

如果你興趣係讀商科,咁恭喜你!你可能天生就好有商業頭腦。如果你係冷門科畢業生,請不要灰心,須知道︰大熱可以倒灶,黑馬可以爆冷。打工讀書也好,重點取其心態。要選適合自己的,而不是變成別人認為合適的對象。

延伸閱讀︰
- 【伏味濃】令你OT的5個誘因

- 老屎忽 VS 奴隸獸 辦公室的天與地

- 【小薯求生包】4招完美結束對話

- 唔該,改好啲個file name

- 【職場和平】如何避免政治爭拗白熱化

上載日期︰2016年9月5日


Look out for further updates on our Facebook fan page!

Related Articles

More