comScoreTag
FancyBox
FancyBox

見工面試

【錯晒】HR數求職4大「咪以為」


CTgoodjobs編輯部



搵工, 面試, 求職, 見工, recruitment, HR, interview

規矩係死,人就係生嘅。總之咩都咪以為,凡事有可能,執生喇施主。

唔敢劈炮,因為以為搵工唔容易。
隨便遞信辭職,因為以為自己骨骼精奇。
不肯放手,因為以為再也不會遇見更好。
逾期居留,因為以為這是最後的歸宿。

留意番,以為以為,每個「以為」都深深影響我們的選擇及行動,小至求職面試,大至一生幸福。大家的「一生」編輯仔負擔不起,唯有細眉細眼,捉出求職者搵工面試時經常出現的4大累事「我以為」。

累事1:以為Ex老闆唔講得

天真豬示範:「上次個HR問我『最唔鍾意上一份工啲乜?』我咪話無囉,一句都無數過個Ex腦細。」

HR數「咪以為」:「咪以為『陳述』同『唱衰』無分別。求職者一個『無』字,我地會認為佢地有所隱瞞,絕對會扣分。」

重點︰求職者大方回應客觀而有建設性的善意批評,有助突出個人正面特質。例如:「前上司嘅溝通模式比較單向,容易產生誤會,咁令我更體會到雙向互動溝通係好重要。」

累事2:以為見工面試時,說說笑有助緩和緊張氣氛

天真豬示範:「今日面試一開波我就講個爛Gag乜乜乜,個HR唔笑不突止,竟然重『疑似』黑我面。」

HR數「咪以為」:「咪以為你識講笑,人地就一定識笑或者會陪笑。」

重點︰HR請人時通常「認真mode」上身,建議求職者睇餸食飯,遇著個「面試黑面神」,就切忌嬉皮笑臉;不過遇著個親切的,則不妨笑笑說說想想,提升好感。唯黃色、低俗、無品笑話,講一個都嫌太多。更多關於《搵工人夾人︰3分鐘篤爆面試官》,按此

累事3:以為爭取機會問問問實無死

天真豬示範:「上次見工我幾叻叻呀,狂問問問,我問問題多過答問題,係咪醒先?」

HR數「咪以為」:「Well,咪咁單純以為『問問題』就係王道。須知道,搵工面試,膠問衰過膠答。」

重點︰高明、言之有物地發問才是搶分關鍵。提問次數須視乎對方的回應來決定,假如面試官表現抗拒,那就切忌「死cher」追問;相反,若雙方愈傾愈起勁,那就不妨多加提問,tune正個channel。

累事4:以為面試時絕不能提及薪酬福利等敏感話題

天真豬示範:「個HR問我Expected Salary係幾多,我梗係幾歹都唔講啦,唔講得架嘛!」

HR數「咪以為」:「係,薪酬福利係敏感,求職者不宜多提,否則未免表現得太市儈。不過,如果HR問到,求職者無得唔答囉,你估我問你真係貪過癮咩。」

重點︰傾人工好視乎Timing,若面試官主動提出,即代表時機已經成熟,求職者不妨大方提出薪金要求。而金額方面,務必預留「走棧位」,保留議價空間(稍高於底價10%至15%為宜),好讓對方還價。更多關於《【咪制!】搵工、傾人工 5大「蝕章」》,按此

總結:規矩係死,人就係生嘅。總之咩都咪以為,凡事有可能,執生喇施主。

延伸閱讀︰
-【CV懶人包】半百範例任你下載

-【面試複賽】Second In備戰3式

-【CEO選】5大見工難題x過關5招

-【搵工男女】7大加分魔「髮」

-【臨急抱佛腳】面試備戰4懶式

上載日期︰2014年11月12日


讚好 CTgoodjobs 專頁,獲取更多求職資訊!

以上文章由www.CTgoodjobs.hk編寫,文章版權屬CTgoodjobs所有。任何人士或機構如欲刊登有關文章於其他網站或刊物,都必須要以書面方式獲得批准,詳細情形請電郵至editor@CTgoodjobs.hk查詢。CTgoodjobs對一切侵犯版權行為保留追究權。

Free Subscription

Email