【家庭關係】從小到大跟兄弟姐妹比較 打工仔自言壓力大︰永遠睇死我

兄弟姐妹共同成長,難免會有比較,適當的競爭會為雙方帶來進步,但假若經常要為你爭我奪而破壞彼此的關係,百害而無一利。讀者K先生分享從小到大的家庭關係,因為自己有位讀書叻的哥哥,由讀書到現時工作,父母都會將他與哥哥比較,小時候沒想太多,直至中學開始就覺得壓力越來越大,甚至令他患上抑鬱症…

按圖了解K先生的故事︰

 

「今年我33歲,雖然我係男人,但我本身嘅性格唔係好Tough,成日都會唔開心。呢排我感受特別大,因為我好似做到幾好,身邊嘅人都睇唔到我努力咁。尤其係我屋企人,其實由細到大佢哋都會將我同哥哥比較。我哥哥大我兩年,大家年紀差唔多,由讀書開始,哥哥都係讀書好啲、成績好啲。

小學嗰陣,我測驗/考試成績唔好,我父母就會鬧我,話我點解無哥哥咁聰明。我記得當時嘅我,淨係覺得好委屈,因為我知自己真係讀唔到書。中學開始,父母少咗理我學業方面,我知自己讀唔到書,就向運動同課外活動嗰邊發展。不過無論我拎到幾多獎,都不及哥哥一張成績表耀眼。中學時期,其實我壓力好大,我一直無講畀屋企人知。雖然最後我都讀到大學,但係佢哋又覺得我讀嗰間大學,唔夠哥哥勁,又比較。

出嚟做嘢,我慶幸自己都算順利,一直好畀心機工作,人工同職位都唔算差。不過直到而家,父母都係覺得我搵錢少過哥哥,成日都畀說話我聽。有段時間,我真係唔開心到有抑鬱,但我無講畀屋企人知。我有睇過精神科醫生,有食過藥,但我知食藥解決唔到我嘅問題。我一直知我唔開心嘅原因係咩,就係一直以嚟嘅比較。

大家可能覺得我無用,男人老狗都為咗呢啲小事唔開心。但其實我一直都耿耿於懷,點解父母唔可以欣賞下我,appreciate我嘅努力?可能呢啲比較,就係令我進步、令我發奮嘅原因啦….但我真係好想同我父母講一句,其實我已經盡咗力了! 」

延伸閱讀︰【香港房屋問題】加人工要畀多啲家用?細妹大呻︰阿媽要我補貼哥哥租樓

甚麼是抑鬱症?
抑鬱症 (Depression)會令人長期處於低落的情緒,嚴重者更可能產生輕生念頭,因此你懷疑自己或身邊的人疑似有抑鬱症症狀,就要提早治療。

如果想判斷有沒有患上抑鬱症,可留意以下幾點︰

1) 情緒低落

2) 對本身有熱愛的活動失去興趣

3) 暴飲暴食或食不下咽

4) 睡眠習慣改變,渴睡或失眠

5) 坐立不安或把自己閉上

6) 整個人沒有精神、動力

7) 難以集中精神

8) 有罪疚感

9) 有自殺傾向

如何治療抑鬱症?
主要分3種方法,包括心理治療、藥物治療及合併治療。心理治療主要是讓患有抑鬱的人士了解自己的情緒、想法及行為,再從中協助他們面對困難;藥物治療就是患有抑鬱症人士,經過專業精神科醫生評估後,透過抗抑鬱藥,紓緩情緒問題;合併治療顧名思義是同時進行心理治療及藥物治療。

 

香港中文大學香港健康情緒中心【抑鬱症自我測試】

生命熱線︰2382 000

香港撒瑪利亞防止自殺會︰2389 2222

 

延伸閱讀︰【家庭關係】打工仔因咩事寧願OT 都唔想返屋企食飯?

延伸閱讀︰【家庭關係】30歲兒子月入一萬幾借錢過活 爸爸︰立平安紙留層樓同資產畀佢?

延伸閱讀︰【家庭關係】女友媽媽要求畀家用 男網民︰第一次拍拖 應該畀幾多好?

Look out for further updates on our Facebook fan page!

Looking for jobs?