comScoreTag
FancyBox
FancyBox

Workplace Gossip

7件辦公室必備物品!


文:子都



office item
打工仔必備維生物品

香港工時冠絕全球,打工仔被困Office的時間仲多過留喺屋企,又點可以唔準備番幾樣維生物品應付日常所需?

1/ 健康零食
打工仔通常會為自己添置一個零食櫃(倉),悶攰hea的時候就噍食咬,但高油鹽糖的零食無助改善精神狀態,只會影響健康。

點算好?從今日起不要再沈淪「朱古力、薯片兼軟糖毒海」。建議選擇比較清淡的食物,例如水果、核桃、全麥餅乾,低脂高纖得嚟又有營養,能夠增加飽肚感,間接有助減肥。

2/ 叉電器
人人一機在手,天下我有。上網聽歌睇片係佢,約客食飯、同朋友WhatsApp都係佢,咁玩法部電話好快無電。

點算好?辦公室應長期放條USB線,甚至叉電插頭,咁就唔怕被世界遺棄啦。

3/ 遮
香港成日落雨,天文台所謂的預告同星座運程一樣,講咗等於無講。

點算好?都係擺番把遮喺公司穩陣啲。如果咁好彩放工落雨遇著女神/ 男神無帶遮,你的機會就來了。

4/ 冷衫
唔知點解,間間Office的冷氣永遠好似唔使錢咁開到大一大,想熄又熄不了。

點算好?呢個時候一件冷衫就可以帶你離開雪櫃。除咗保暖,仲可以提升文藝氣質,一舉兩得。

5/ 鞋
女人,總係敵唔過靚的誘惑,一對高踭鞋令OL們為之瘋狂,但其實著高踭鞋除咗腳痛,更加對健康有嚴重損害,例如會出現腳趾外翻、脊骨移位、腳底筋膜炎等等。

點算好?女士們不妨擺對平底鞋喺公司,唔使開動作戰mode(開會/ 見客)的時候,畀對腳抖下。男士們一樣可以預多對皮鞋以備不時之需。

6/ 襪
女士絲襪易勾爛唔使講,但著長襪的打工男都唔可以掉以輕心。男士們普遍比較大汗,夏天噏住對腳發出異味好噁心囉唔該!

點算好?無論男女都應該放多兩對襪喺公司方便替換。當然,著完要帶返屋企洗啦。

7/ Dress up配飾
所謂天有不測之風雲,人有霎時之蛋撻,呢個世界好多嘢估佢唔到。臨時有會要開、大老細突然殺上嚟巡視業務、個客失驚無神約你食飯,如果你唔係日日Chok住返工,都可能殺你一個措手不及。

點算好?一件Dress up配飾絕對會救你一命!男士可以擺個煲呔喺公司,女士則不妨準備條絲巾,易襯又唔阻埞。

延伸閱讀:

-你新嚟架?咁Green嘅?

-【人緣UP】職場6大說話技巧+3樣貌特徵

-【飛甩奴性】 7招向OT說不

-同老細相處 (3)︰開例會

- 有種OT,叫17:59收Email

上載日期:2015年11月4日


讚好 CTgoodjobs 專頁,獲取更多求職資訊!

Free Subscription

Email