comScoreTag
FancyBox
FancyBox

Job Market Gossip


Job Market Gossip

論盡辦公室八卦,同一眾打工仔秒殺公司內人情世故、蜚短流長,做個稱職 career man / career woman。宗旨︰懂得做事,亦要懂得做人。


7大易肥行業,你有無份?

文:子都

 
overweight
打工仔經常一坐就係一日,活動量極低,時間一長會導致脂肪積聚,減慢新陳代謝。
身邊唔少同齡朋友自從成為打工仔,明明日日做到無停手,長期勞心勞力,但唔瘦不特止,體重仲大有直線上升之勢。究竟點解會咁?原來增肥可能同壓力有關。

美國求職網站CareerBuilder早前委託調查公司,訪問逾3,000名全職打工仔,發現有55%人認為自己有過重問題,當中77%同時感到極大的工作壓力。至於比較受訪者的性別和職級,事業女(49%)較打工男(39%)容易致肥;管理層(49%)比非管理層員工(43%)更大機會有過重問題。

7大易肥行業:
第7位:IT(38%)
第6位:製造業(39%)
第5位:零售服務(40%)
第4位:銷售(46%)
第3位:金融(46%)
第2位:醫護(48%)
第1位:運輸(49%)

嘩!一睇,唔少都係香港主要行業,而致肥原因離唔開以下3點。如果你中咗,係時候戒喇!

1/ 久坐不動
打工仔經常一坐就係一日,活動量極低,時間一長會導致脂肪積聚,減慢新陳代謝。除咗會令體重上升,亦會令腰部、下身肥胖,出現水腫甚至橙皮紋!另外,Lunch係打工仔唯一可以到戶外走動嘅機會,但好多人係自己帶飯盒,就會令呢個機會都無埋。

解決方法:每隔1個鐘做啲簡單伸展動作,例如挺胸拉背、向後扭腰、雙手前推等,亦可以起身斟水,行去洗手間,藉此刺激血液循環,減低下半身壓迫。就算喺公司食飯,都留少少時間飯後出外散步,活動筋骨。

2/ 收工後太攰,唔想做運動
「收工後成個人散哂!」相信係唔少打工仔心聲,更加不幸嘅係,好多人直情係有開工無收工,所以一收工,淨係想極速返屋企沖涼撻落床瞓,完全無精神無時間做運動,簡單黎講就係唔願郁。而假期,都只會用嚟補眠。殊不知呢個正正係致肥元兇。因為唔做運動會令新陳代謝變慢,身體容易積聚脂肪之餘,個人亦更加容易覺得攰,形成一個惡性循環,令體重有增無減。

解決方法:就算真係無時間打波、做Gym,平時都應該捉緊每個機會做運動,例如樓層唔多可以選擇行樓梯、行多一兩個站搭車、喺屋企做下深蹲、卷腹、掌上壓等唔需要器材嘅運動。

3/ 食零食減壓
壓力大會增加人嘅食慾,而好多打工仔亦鍾意食零食減壓,但零食通常高糖、高脂肪兼口味濃,令人愈食愈想食。經常食用令身體攝入大量卡路里,但又唔做運動消耗,唔肥就假啦!

解決方法:謝絕零食,多飲水以抑制食慾。如果下午茶時間真係覺得好肚餓,不妨以一份天然水果(例如一個橙、蘋果、梨)代替零食。

寫到呢度,小生自己都有啲驚,唔講喇,我要Sharp走衝去做Gym呀!

延伸閱讀︰
-【遞信前】留意番4點

-老細最乞人憎嘅說話

-【劈炮被挽留】老細邊句話能令你留低?

-老細,不如你試下住屯門丫

-【被炒魷】遣散費點計?

上載日期︰2016年4月28日


Share


Free Subscription

Email