【CV已讀不回】4大死因 + 翻生攻略

【CV已讀不回】4大死因 + 翻生攻略
文:子都

cv noreply
CV嘅重點係推銷你自己,所以要強調你「做了什麼」+「做得不錯」。

年年轉工旺季都有人話寄出過百份CV無回音,差點以為Email壞了、電話壞了、HR「被失蹤」。其實撇除以上不幸原因,比較可能的是你誤觸CV地雷,令閣下份CV未出閘已撻Q,HR睇都唔想睇自然無面試機會。以下係小生發現的常見陷阱,各位求職者自己睇路喇。

死因1:段落式陳述
「During my time at XXX company, I created and updated 30 sets of product data every day into 5 main computer programs with speed and correctness. Also, I handled 30+ phone calls daily…」下刪5,000字。

大佬呀,你自己見到呢串水蛇春咁長嘅文都唔想睇啦,將心比己,你點期望個日睇N份CV嘅HR會有耐性睇?一嘢就掉落資源回收筒啦!

翻生攻略:HR通常採用一目十行嘅方法檢閱CV,所以最好用點列式列明工作內容、技能、教育程度等重要資訊,令佢一眼就睇到你條件適唔適合。

死因2:大量形容詞
「A dynamic team leader; able to bring energy, enthusiasm and humour to motivate team members to achieve potential and meet objectives. 」

齋睇呢個自我評價部分,就好似睇緊名人勵志傳記咁,講到自己集天下優點之大成,可惜全無論據支持,難免顯得自吹自擂口行行。

翻生攻略:用數據、事實代替形容詞。例如以「連續3年獲選為優秀員工」證明業績突出、態度積極;以「帶領5人小組完成XX項目」證明自己具領導才能及團隊精神。

死因3:漁翁撒網
唔少求職者為求方便,一份CV寄去N間公司,實行一雞幾十味,諗住實有一間中,但呢種列出18般武藝嘅做法會令CV缺乏針對性,含有好多對應徵公司嚟講無用嘅資訊。HR一見水份咁多,廢話程度拍得住垃圾郵件,即OUT!

翻生攻略:根據招聘廣告嘅職位要求度身訂造你嘅CV,盡量將過往嘅學歷、工作經驗同申請職位連上關係,甚至巧妙地搬字過紙,將招聘廣告關鍵字加入CV,令HR有一種一拍即合嘅感覺,勝算自然大增。

死因4:無重點
年資淺嘅求職者往往會羅列過往嘅工作職責(無論幾瑣碎都好),甚至學生時期參與過嘅活動,令內容睇落豐富啲,但其實咁樣無助你整靚份CV。HR只係見到一堆活動描述,無從得知你嘅能力。

翻生攻略:CV嘅重點係推銷你自己,所以要強調你「做了什麼」+「做得不錯」。最好用一行寫工作職責嘅時候,用兩行寫相關成就、達到嘅業務目標、活動結果,藉此顯示你嘅能力。

延伸閱讀:【CV乜乜乜】5大另類搶分寫法
延伸閱讀:【Profile Pic】7大CV揀相宜忌


Look out for further updates on our Facebook fan page!

Related Articles

More