comScoreTag
FancyBox
FancyBox

Job Market Gossip


Job Market Gossip

論盡辦公室八卦,同一眾打工仔秒殺公司內人情世故、蜚短流長,做個稱職 career man / career woman。宗旨︰懂得做事,亦要懂得做人。


你想自己走?定我炒你?

董德少

layoff
上司與下屬、同事、朋友、情侶,本是同根生——都有阿媽生。
「唔係呀嘛,咁刻薄都講得出?」為求力保個人專業形象,我極力將這句帶有強烈感情色彩的心底話,永遠埋藏在心底裡。

茶餘飯後,新同事Q木無表情說︰「我遇過一個老細,佢真係直接問個啱啱出嚟做嘢未過3個月Probation嘅後生仔︰『你想你自己走?定我炒你?』我見唔對路,梗係拿拿臨搵路閃人啦。」

的確,此路不通,無鞋都應該挽屐走。

「個後生仔工作表現如何?」下定論之前,須掌握成件事的Whole picture。「表現如何」4隻字,毫無疑問比「做嘢好唔掂」中肯、「伏-free」得多。

早前英國曼徹斯特大學(University of Manchester)研究發現,裁員損害被裁者對他人的信任,甚至危及健康;影響可持續近10年;即使找到新工,亦未必有助改善情況。而更無陰公的是,這些被裁員工往往是職場中最投入的人才。(詳情按此)高高在上、手執「生殺大權」的管理人,務必引以為鑑,「斷送人一生前程」這個罪名,可負擔不起。

「正常後生仔囉,比上不足,但勝在肯學肯做,係唔識討人歡心。講真,有幾多個人骨骼真係咁精奇,天生出嚟就係打工材料丫?況且……」Q吞吞吐吐。我給他打了一個「心照,呢度講呢度散」的眼色,他繼續︰「況且,而家成個職場生態都扭曲晒。」

老細求要同事散水時要有品,沒錯;而管理人即使難以做到100%公正無私,在法律面前人人平等,亦至少不要雙重標準到這個地步——我鐘意幾時炒你就幾時炒你,但你劈炮唔撈就天諸地滅。

真的,所有老人家,都曾經年輕過;而每位人地老爸,都做過人地個仔;同樣道理,所謂的「老細」,基本上都經歷過「做o靚」的時代。「你想自己走?定我炒你?」這種刻薄對白,巫婆後母尚且未對白雪公主講過半句。

上司與下屬、同事、朋友、情侶,本是同根生——都有阿媽生。無論劈炮辭職、炒人換血、整頓縮皮、移情別戀,還是貪新厭舊……不必下下一生一世,亦至少好嚟好去,這是對人、對自己的基本尊重。

延伸閱讀︰
- 老闆都是方丈來的(得罪方丈7事)

- 8個Unlike「少爺仔」的原因

- 【秘撈供樓】考慮4件事

- 【Part Time】保你大

- 升職就唔識人?

上載日期︰2015年4月13日

Share


Free Subscription

Email