comScoreTag
FancyBox
FancyBox

Job Market Gossip


Job Market Gossip

論盡辦公室八卦,同一眾打工仔秒殺公司內人情世故、蜚短流長,做個稱職 career man / career woman。宗旨︰懂得做事,亦要懂得做人。


佢地扮夠未?

董德少

workplace actors

秒秒鐘都是雕啄演技的時機,要競逐「最扮唔乞人憎」同事殊榮,其實唔難。

「德少,頭先開會老闆話咩咩咩,你估其實係咩意思?」開完大會一踏出會議室,出名精甩尾的同事Y,一臉天真向我旁敲側擊。針對猜心這學術範疇,在精甩尾面前我甘拜下風,相信世間上再沒有任何一種人比這個人種更權威了。

「頭先我見你不停點頭,以為你一定明晒,重諗住轉頭請教返你添。」我扮無知地將個波推回去。「唉,我其實只係扮明。」Y(扮)無奈地說。然後我扮明白他所謂「扮明」的意思,但求軟著陸完結話題。

扮明、扮唔明;扮知、扮無知;扮做、扮無做;扮識、扮唔識;扮和諧、扮不和;扮積極、扮hea;扮勁、扮唔勁;扮嘢、扮無扮嘢……「扮」公室果然是亞皆老街太子道地區最受歡迎的大舞台。人人都可以成名至少3分鐘,甚至紅足3萬年。秒秒鐘都是雕啄演技的時機,要競逐「最扮唔乞人憎」同事殊榮,其實唔難。

Y的演技登峰造極、爐火純青,因為不願錯過任何一個扮嘢的機會,甚至叫下午茶,他說要A餐,給他點B餐就不會錯。無人明白他為甚麼這樣,就當是「扮嘢症候群」、「扮嘢強迫症」便沒那麼扯火。

Y從前的師父,亦是我們的舊同事,姑且叫他「爺爺」。爺爺很聰明,對所謂「辦公室政治」有全盤掌握。大概因為無敵最寂寞,所以他將當時初出茅廬的Y捧作心腹。Y不負所望,承傳爺爺畢生絕學,甚至青出於藍。最後,不用說,爺爺自然是敵不過年輕有為的Y,被鬥走了。他last day那天,買了四打散水餅,吃剩48件。

Y繼承爺爺衣缽,繼續演活爺爺的角色。「佢扮晒嘢啦,勁過佢師父。」「自求多福啦,嗰個人最叻扮。」「扮啦扮啦,睇佢扮到幾時?!」面對Y,其實甚麼都不必說,更不必做,只要想到曾經有一位爺爺,就幾乎看見他的下場。同時亦要引以為誡,爺爺一個已足夠,警惕自己不要成為另一個。

延伸閱讀︰
- 對住老細口啞啞?

- 老闆術語Decoder

- 職場翻版《金枝慾孽》

- 辦公室一喊就輸鳥

- 10大工作間搞和諧金句

上載日期︰2013年6月3日


以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。
Share


Free Subscription

Email