comScoreTag
FancyBox
FancyBox

Job Market Gossip


Job Market Gossip

論盡辦公室八卦,同一眾打工仔秒殺公司內人情世故、蜚短流長,做個稱職 career man / career woman。宗旨︰懂得做事,亦要懂得做人。


侮辱性加薪

董德少

insulting payrise

係咪你愈盡心盡力做嘢,啲人就愈得寸進尺、欺人太甚?

「哼哼!」同事M冷笑兩聲,伴隨空洞的眼神。M極度鄙視的神態,甚至讓我開始懷疑世界。M出名是「正面人」,面對任何逆境,都一派「方法總比困難多」、「沒有甚麼解決不了的困難」的姿態,彷彿問題不曾存在過。但這一次……

「我無聽錯丫嘛?正面人,你可唔可以話畀我知頭先係我聽錯,你其實係講『哈哈』?」我的扮無知,換來M一個更凌厲的鄙視眼神,我就知道瀨嘢了。

「我發現,可能一直係我太天真豬……」M墮入無底深淵。

我示意M入房,好讓我們打開心窗。「到底發生咩事?」我問。

「公司加咗我人工。」M曖昧答。

「恭喜你,咁咪好囉!你係咪諗緊『無功不受祿』之類嘅老套嘢?例如佢加$1畀你,你要交多$10功課?你唔使擔心……慢慢習慣就OK,我睇好你架!其實最緊要係學習同高層相……」

「哼!」我還未說完,M就忍不住駁嘴。「德少,係你天真定係我太不識抬舉呢?」我不知所措地望了他一眼,確認我眼前的的而且確是我一直認識的M。「如果我話畀你知,佢加咗我$100,你會唔會都係叫我畀心機做?」

一時間,我說不出話來。甚麼?加$100?分明是侮辱性加薪,你唔加畀我反而無咁嬲!況且M的工作態度和能力,是有目共睹的,絕對不應受到此等侮辱。Xyz&$^#&@!@!*(#$$&^@ 但面對眼前哀莫大於心死的M,我只能極力抑壓內心的騷動不安,以免徒添不必要的困頓。

「我唔知我做錯啲咩!德少,係咪你愈盡心盡力做嘢,啲人就愈得寸進尺、欺人太甚?」M漸回復「正常」,對話終於有了應有的「溫度」。

的確,世界並不一定是公平的,類似的事其實不是甚麼新聞,分別只在於侮辱性的高低,而這個$100,算是相當高手。「嗯,咁你有咩打算?唔使即刻答我,你呢幾日冷靜下,好好諗下點樣行落去。係去係留我都支持。」M不是我的直屬下屬,所以加人工的事不輪到我去出主意。

「作為你同事,我好高興可以同你共事;作為朋友,我祝福你有更好嘅發展。」我能夠給予的,是對於他人格和能力的肯定。

延伸閱讀︰
- 80後笑90後

- 假如沒有遇過x老細……

- 詛咒「射波」星期一

- 「被透明」的散水者

- 成為人地辭職原因之前

上載日期︰2014年3月10日


以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。
Share


Free Subscription

Email