comScoreTag
FancyBox
FancyBox

Job Market Gossip


Job Market Gossip

論盡辦公室八卦,同一眾打工仔秒殺公司內人情世故、蜚短流長,做個稱職 career man / career woman。宗旨︰懂得做事,亦要懂得做人。


【劈炮轉行】純粹貪玩?

董德少

轉行, 同事, 見工, 鋒菲, 劈炮

career change
懂得扮堅定的混沌的人太多,最好真是連自己都呃埋。

「德少,有無時間?有嘢想同你商量下。」同事Z有點不好意思來敲我房門。當我示意他「坐低,請講」的時候,身為男子漢大丈夫的他扭扭擰擰起來︰「不如都係陣間食飯先講。」

無事不可對人言,要特地約食飯先講的,大概都是心底裡面的說話——即未經修飾過濾、純天然唔經大腦的真心話。為了保住專業形象,尤其在辦公室範圍內,我只能盡量隱藏好奇心,清清痰已起的喉嚨說︰「陣間大堂見。」

「係咪發生咗咩事?」我隨即將捲好的意大利粉塞進口裡,故作漫不經心。

「我諗過喇德少,我都係想轉行。」Z比我更漫不經心。

「哈,」我真心覺得可笑,卻完全笑不出︰「唔知邊個嚟見工嗰時,實牙實齒話入呢行係佢夢想,等我信以為真,就算佢無呢行經驗,我都要請佢返嚟,以為佢係可造之材。」

聽到我的真情剖白,Z不敢說話。我望望他,又將意粉塞入口。大家背脊骨落地吃完一頓背脊骨落的午餐。

同事出出入入,我沒有意見。鋒菲分手11年後復合,果真動地驚天愛戀過,我尚且不覺得出奇,更何況區區打工仔劈炮想轉行;而且因當機立斷轉行而成功者,亦屢見不鮮。但我替Z可惜。

大約半年前,Z來見工。那時候,他比一般求職者更落力「演出」,表現出轉行的決心。說甚麼兒時夢想不在話下,甚至說「除此之外,不作他選」。我深信,如果一個人能夠如此這般熱情地追求一件事,即使不轟轟烈烈,至少亦會做得好好睇睇。

「你想轉行,我無話可說,只要你諗清諗楚。」我打破沉默。畢竟,拒人於千里不是小弟的作風。「不過我好懷疑,你係咪真係諗清諗楚。做嗰行厭嗰行,做邊行都要過呢個關口。」

Z無言以對。我繼續︰「老實說,以你爐火純青嘅見工技巧,要轉行絕對唔難。但係每半年轉一次行,重有幾多個『半年』可以畀你任性落去?」

懂得扮堅定的混沌的人太多,最好真是連自己都呃埋。

延伸閱讀︰
- 「阻住地球轉」老闆10大特徵

- 不是做到隻狗就會有花紅

- 別以人地把刀插自己

- 跳火坑變跳火圈

- 有AO,真係唔做?

上載日期︰2014年9月22日

Share


Free Subscription

Email