comScoreTag
FancyBox
FancyBox

Job Market Gossip


Job Market Gossip

論盡辦公室八卦,同一眾打工仔秒殺公司內人情世故、蜚短流長,做個稱職 career man / career woman。宗旨︰懂得做事,亦要懂得做人。


【打工煩惱】Lun廚煩膠8件事

薯仔 L

「啲嘢未做完,邊有Lun廚呀!」

「辛苦搵嚟志在食」,Lun廚是每日中場休息時段,正當希望鬆一鬆之際,卻又遇上各種「煩膠」事。

【Office堂食之苦】
1/ 慳錢又唔想學護士捱麵包,叮飯就是窮人恩物。但問題是Pantry微波爐數量仲少過加薪幅度,幾廿人苦等部「老爺爐」,感覺就如放工在金鐘站排港鐵,「叮多幾班」都已經點半。

2/ 如果叫外賣,食完即棄當然瀟灑,但自家製便當就難逃洗飯盒的命運。用30分鐘叮飯,300秒速食,之後仲要排隊洗碗。最後搞到水花四濺,難怪清潔姐姐會西面窒你一句「多謝晒!」。

3/ 好的,我叫外賣可以了吧!Sorry,集體叫外賣隨時「A餐熱奶茶」變「C餐凍檸水」,有進無退之下唯有「硬食」。當每一個外賣都正確無誤,閣下中六合彩之日應該不遠鳥。

以為出去食就可以輕易過關?少年你太年輕!

4/ 腦細為展示親民一面,會紆尊降貴問你去邊開飯(留意番:潛台詞係佢想Join)。此時,除咗個心會嚇到離一離之外,同時亦感受到身後「飯腳們」一股強勁不爽氣場。

5/ 夏日炎炎連個天都唔鍾意你,放Lunch總要在雨天。未行出兩個街口已經同雨水玩遊戲,再配合內置超強冷風,認真「延年益壽」,熱檸樂溝感冒藥都唔掂。

6/ 一個卡位4個同事簡直天衣無縫,但遇著腦細Ad-hoc加入,卡位唔夠坐、大枱又輪唔到你,結果又要返去茶記「濕等」。要不然就抄東華籌款蹺「碟疊碟」,將所有人都塞進卡位之中。

7/ 平時食飯話題離不開歌頌腦細「英明領導」,但當事人在場個個即刻龜縮入「鵪鶉Zone」。結果,選擇A是Dead air,選擇B就唯有講公事,又要Chok出一副「做嘢樣」。

8/ 當同事撩牙中,而你的常餐B仍未有著落,忍唔住追問「常餐B未嚟嘅?」;正想Cut單之際,侍應大叔就會立即變臉兼霸氣大你一句「落單唔使時間呀?」。

如果閣下都擁有以上煩惱,不幸中還算大幸。因為當你Dry等「老爺爐」或者苦候著常餐B來臨的同時,Office中其實還有一班怨念極重的餓鬼正吶喊著。「啲嘢未做完,邊有Lun廚呀!」

延伸閱讀:
- 【Office日誌】打工仔必做10件事

- 【跳起Yeah!】霸氣拎Annual 5式

- 羅生門之.狂OT是傻的嗎?

- 【耿耿於懷】返工瘀爆8件事

- 【90後新手】4大職場「怪獸」實例

上載日期:2015年8月28日


以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。
Share


Free Subscription

Email