comScoreTag
FancyBox
FancyBox

Job Market Gossip


Job Market Gossip

論盡辦公室八卦,同一眾打工仔秒殺公司內人情世故、蜚短流長,做個稱職 career man / career woman。宗旨︰懂得做事,亦要懂得做人。


【散水好西】7種

文:子都

香港乃國際城市,為照顧不同「食家」需要,小生特意推薦以下7款跨國好西。

食好西無分季節,開心要食,唔開心要食;見工要食,散水更加要食。打工仔想好來好去,就算幾唔願意都要服從下職場潛規則,派一派散水餅。不過唔好以為買打連鎖店西餅或蛋撻就了事,呢兩樣野攞出嚟不但無效果,仲會被嫌棄。香港乃國際城市,為照顧不同「食家」需要,小生特意推薦以下7款跨國好西:

【港式篇】
1/ 山水豆腐花

豆腐花味道清新口感滑溜,含豐富蛋白質,相對其他甜品算係低糖,比較健康,就算怕肥嘅女同事都可以食多兩啖。更加重要嘅係佢個名,寓意山水有相逢,一份甜品雙重意義,必定令同事們留低深刻印象。

2/ 煎釀三寶
煎釀三寶作為港式地道小食,充分彰顯到辦公室散水餅文化。新鮮熱辣香脆嘅青椒、茄子、鯪魚肉,令人食過翻尋味。下午茶時段派,一班同事拎住支竹籤篤篤下,好似打邊爐咁熱鬧,都不失為一個完美嘅句號。

【西式篇】
3/ Cupcake

同西餅一樣屬於蛋糕類,但勝在口味多、外表靚,有得影相呃Like之餘仲滿足到口腹之慾。市面上有眾多品牌選擇,包括Twelve Cupcakes、Sift Patisserie、Kisses Cupcakes等等都非常出名。如果唔清楚同事口味,買大路嘅朱古力、士多啤梨、綠茶味實無死。

4/ Macaron
Macaron精緻得嚟有貴氣,就算你班同事平時幾奄尖聲悶兼自命品味非凡,應該都唔會彈,甚至有機會博得一眾港女OL稱讚。城中名店Pierre Hermé、Fauchon、Paul Lafayet嘅分店都位於商業區,非常方便。

5/ 雪糕
雪糕一年四季都啱食,任何一間便利店、超級市場都買到,唔使用腦求其執一堆就得。如果想特別啲,可以試下特色甜品店例如:Godiva、Milk Top、A-1 Bakery嘅出品,但個荷包就會赤啲囉。

【日式篇】
6/ 芝士撻

人氣爆燈熱潮持續嘅芝士撻,BAKE、半熟工房嗰啲,買親都要排隊,買嚟做散水餅,同事一方面感受到你嘅誠意,另一方面亦能顯示自己有潮流觸覺。香濃芝士加流心效果,就算你平時唔係人氣王,亦會即刻變得受歡迎!

7/ 泡芙
泡芙有鬆脆外皮加軟滑忌廉,細細件唔會太飽,每個有獨立包裝,方便衛生,可以逐個逐個同事派,逐一Say goodbye。牛奶、吉士、朱古力、芒果、綠茶味等等等等任君選擇,令人精神為之一振。

延伸閱讀︰
- 有一種無力感叫返工

- 【劈炮分手】遞信時應有的對白

- 【睇住呀!】被劈炮5先兆

- 【捉心理】5個職場「升呢」小把戲

- 當你唔再係Fresh Grad……

上載日期:2016年2月25日


以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。
Share


Free Subscription

Email