comScoreTag
FancyBox
FancyBox

Job Market Gossip


Job Market Gossip

論盡辦公室八卦,同一眾打工仔秒殺公司內人情世故、蜚短流長,做個稱職 career man / career woman。宗旨︰懂得做事,亦要懂得做人。


【新手上路】返新工6個「以為」


文︰魏民菁

iamnew
一切的「以為」,都是FF出來的。
人生總有好多第一次,第一次考試Fail、第一次打爆機、第一次搭錯車……要數當中轉變最大的,應該是由學生身份變成職場新人,面對人生「第一次返工」。外來資訊太多,實戰機會太少,於是造就Fresh Grad對返工的無限FF。今次就為大家拆解返新工的6個「以為」︰

1/ 以為會準時返到公司
通常面試官會安排求職者喺非繁忙時間見工,意思即係,當見成份工,要正式返工之際,你就會發現朝早原來會塞車,原來會轉唔到車,最後原來是會遲到的。

新手貼士︰事前搵定返工路線之餘,最緊要記低多幾條後備路線,以便不時之需。遇上突發天氣,更要預早出門口,同埋留意最新交通消息。

2/ 以為咩都唔使帶
唔好以為請咗你就一天都光晒,於是兩手fing fing去返工。

新手貼士︰返新工前應Check下公司發出的Email,檢查對方要求你所帶的文件,因為有部分HR須要再核對所有文件(例如證書、過往工作證明等)。另,在未掌握公司所提供的設備時,應自備筆記簿、少許文具、紙巾、水杯等必需品。

3/ 以為著咩衫都得
時下興Business Causal,但絕對唔好因為「Causal」一字就以為「返工」同「返學」差唔多,著得太hea人地會覺得你唔尊重公司。

新手貼士︰見工時,不妨多留意面試官的衣著打扮。若錯過了機會,建議返工前向HR打聽一下。事實上,恤衫加布褲、One piece裙等都是最穩陣的著法,另亦可於返工首日留意身邊同事的衣著風格,「邊啲著得邊啲唔著得」自然心裡有數。

4/ 以為做Yes Man實無死
自覺經驗少,「新嚟新豬肉」的心態下就咩都做,又或者叫你做咩都話好。實情是,在其他人眼中,你可能是個只懂順從,不懂批判思考的員工。

新手貼士︰記住職場上無所謂一定啱晒,或一定錯晒。做還做,適當時候都可以作出提問,甚至可以用新人身份,以另一角度提供意見。

5/ 以為公司一定係宮心計咁款
公司總有個是非精、總有人篤背脊、總有小人搞風搞雨搏上位……睇得電視劇太多,以為公司日日都有人爭個你死我活,終日疑神疑鬼。

新手貼士︰雖然唔排除有以上情況,但係未搞清楚真相前(或者永遠都搞唔清),應該先加以觀察,謹言慎行,以免將自己的主觀情感加於其他同事身上。

6/ 以為會有人教做嘢
雖則是返新工,但天下間的老細都會認定你識晒所有嘢,於是就會直接安排10萬個Project畀你,再Chur你交功課。

新手貼士︰當然,返工的頭一兩日會有同事Brief下你有咩做,話明「Brief」,當然只會說明個大概,而不是細節,因為無人會完完全全捉住你隻手去做。嘗試自己去摸索,有唔明照問可也。

 延伸閱讀︰
 - 【搵工新手】7大求職須知

 - 【迎新】職場新丁專屬4武器

 - 【拒絕關公災難】道歉的藝術

 - 裸辭不是罪

- 9種員工性格 星星型最需認同和尊重

上載日期︰2016年7月5日


Share


Free Subscription

Email