comScoreTag
FancyBox
FancyBox

Job Market Gossip


Job Market Gossip

論盡辦公室八卦,同一眾打工仔秒殺公司內人情世故、蜚短流長,做個稱職 career man / career woman。宗旨︰懂得做事,亦要懂得做人。


「正義之鬧」與「為鬧而鬧」

董德少

being scolded
而我相信Y是正義的,因為鬧得有Point,見過太多為鬧而鬧的無的放矢。

「微臣惶恐,本人係咪有咩地方多多得罪?」新仔同事吃飯時口黑面黑,我打趣問。「又俾人鬧囉!」新仔晦氣。明白,典型90後唔鬧得。「何以故?」我盡量淡化「俾人鬧」這個陳述。

「Y生(新仔的直屬上司)話我個Presentation做到甩甩漏漏,個Flow唔順、啲Figures唔夠精準細緻、分析唔得深入,而啲建議太『行貨』無Insights喎。」新仔低著頭,面有難色道。「丫,連個Powerpoint底色佢都有意見,話咩用黃色睇到人眼花喎……」

「嘩,唔係呀嘛,我覺得以新人嚟講,你已做得好好啦喎!簡直完~美!」我七情上面。見新仔終於抬起頭望我,我再加多幾錢肉緊︰「真係喎,個底色用得最絕,黃色『倀』眼到連內容都睇唔到,就無所謂Flow唔flow、Fig唔figures、分唔分析,同行唔行貨喇。」

「咪hea我啦。」新仔露出鄙視的眼光。

「都話你啲90後難服侍,真心畀Comments就話人鬧你;附和你啦,又話我hea你。」我反擊。新仔良久說不出一句話來,我繼續︰「Y生其實都算唔話得,你喎,對你喎,對你呢個Probation都未過嘅90後新仔喎,都肯花時間聽晒你個咁無一足觀嘅Presentation,然後畀意見。可見佢對你有期望,你畀心機。今次有四個不足,下次跑三個,然後兩個……務求半年內要做到無可挑剔。」

打工仔或者「唔太啱聽」,因為但凡幫老細講好話的都是逆耳之言,甚麼「官腔」、「老闆喉舌」、「助紂為虐」之類。小弟不是要為老闆服務,我對「最佳員工」的殊榮嗤之以鼻——反正一個人無論如何都不能討好所有人——我重視的是同事的進步和發揮。姑勿論Y是踩低人地抬高自己,還是真心為新仔好,新仔將自己置於與上司的對立面上,都形同慢性自殺。如果Y是卑鄙小人,新仔會死得好慘;若Y真心提攜,新仔嘢嘢頂到行亦絕無好處。而我相信Y是正義的,因為鬧得有Point,見過太多為鬧而鬧的無的放矢。

我這樣看,被人批評未嘗不是一件好事,至少知道自己衰喺邊。最不知所謂的,莫過於死得不明不白。例如某個正進行得如火如荼的計劃突然「被流產」;上司甚麼都說好,對「做好件事」毫無貢獻;甚至問他甚麼,他都不聞不問,任下屬自生自滅,做到成績就邀功,有起鑊來就「我唔知架,某某全權負責架嘛。」

我在想,如果十幾廿年前也有個像Y的上司,而又比新仔識諗少少,這一路以來的冤枉路也許能兜少幾個圈。

延伸閱讀︰
- 揭「鱷魚頭老襯底」真面目

- 呃假要呃得好好睇睇

- 辦公室務農系

- 辦公室不能輕信的10句話

- XY $&#&%!^世代之︰唔知你講咩

上載日期︰2013年11月18日


以上內容及資料僅屬個別作者的個人意見,並不代表www.CTgoodjobs.hk的立場。CTgoodjobs對因以上人士張貼之資訊內容所帶來之損失或損害概不負責。
Share


Free Subscription

Email