comScoreTag
FancyBox
FancyBox

After Work


After Work

像針與線、車與車輪、生命與麵包、工作與生活的關係相輔相成,缺一不可。生活中包含工作,而工作卻並非生活的全部。學習將時間留給生活,將生活留給自己。


讓座唔讓座,This is the question。


文:子都

seat
唔坐,就唔使讓?

聖誕接新年放假潮已過,交通又回復擠迫,打工仔繼續年年月月晚晚朝朝密密迫車,個個喪屍咁樣。但無論架車幾迫,啲人個樣幾攰,你總會見到車上有幾個位無人坐。點解?因為嗰個係名為優先座嘅中伏位,一坐落去,輕則被歧視,重則被批鬥。

唔知幾時開始,香港流行「被讓座」文化,而「被讓座」嘅通常係後生仔(即係80、90後)。佢地一坐低,姑勿論係頭暈身㷫想作嘔,抑或返工企咗10個鐘對腳就黎斷,都必然會換來其他乘客嘅奇異目光。無人會探究背後原因,或坐低者係咪真係有需要,只會用眼神表達佢地嘅鄙視,同埋等食花生嘅渴望:「陣間有阿伯上車你就知」,無聲仿有聲程度直逼謝檸檬。

假如你係一個坐咗落優先座嘅後生仔,又不幸遇著老屎忽或強國大媽,而你深感自己有需要,理直氣壯拒絕讓座。咁小生恭喜你,就算日月報唔將你放頭條,你聽日都會成為網絡紅人YouTube超新星。

「我返工企足10個鐘對腳就黎斷,畀足全數車費,點解唔坐得?」
「座位一向先到先得,亦無明文規定坐優先座需要咩條件,點解唔坐得?」
「我傷風感冒頭痛肚痛唔通要話俾全車人知先坐得?」

Sorry,以上理由對花生友、老屎忽同強國大媽黎講,通通唔係理由。因為:

1/ 花生友只想食花生,拍片擺上網,睇人XX最開心;
2/ 老屎忽又名老奉,做人宗旨係恃老賣老,最鍾意聲大夾惡話「依家啲後生乜乜乜」、「想當年我乜乜乜」,講到自己幾超然其他人幾卑微,所以你唔讓佢就係罪大惡極,就係目無尊長道德淪喪;
3/ 強國大媽仲勁,唔理三七二十一,五個位坐六個人。你唔讓,佢都會坐,分分鐘坐落你大脾再告你非禮。

無錯,就係咁荒謬,以前讓座是美德,宜家不讓座是罪惡。你唔讓座會被批鬥,但讓座畀啲根本無需要嘅人,自己委屈事小,助長歪風事大。為咗唔再被「to讓or not to讓」嘅問題困擾,最終大家都選擇唔坐。唔坐,就唔使讓。然後,嗰幾個優先座,就好似某啲宗教儀式酒席上嘅空位咁,喺一片人潮之中,非常詭異地,「吉」咗出黎。

延伸閱讀︰
- 放工,是我正職

- 【幸福Checklist】珍惜7種朋友

  -【媽呀】點解發夢都係公司嘢?

- 做老公老婆的條件

- 男追女,定女追男好?

上載日期︰2016年1月14日


Share


Free Subscription

Email