comScoreTag
FancyBox
FancyBox

Job Market Gossip


Job Market Gossip

論盡辦公室八卦,同一眾打工仔秒殺公司內人情世故、蜚短流長,做個稱職 career man / career woman。宗旨︰懂得做事,亦要懂得做人。


返工追求開心好幼稚嗎咩?


返工開心重要咩?小熊由初出道到而家,心態三步曲咁改變。讀大學一考完Final Exam就極速搵工,經學校介紹好快入左一間MNC(Multinational Corporation)工作,人工福利吸引,永遠準時返工放工,份糧畀完家用可以自己洗,已經好興奮。對於職場初哥或者年青一輩,因為未有咁多工作經驗,Set目標就算達唔到都有藉口畀自己重新嚟過,所以工作上壓力有限。

由於未完全脫離學校嘅生活模式,會轉移著重與同事嘅關係,有唔明白能唔能夠得到上司友善嘅幫助,唔會一下子逼迫佢地做大人。所以做得開唔開心,對佢地嚟講絕對係一個好強嘅推動力去Take up更多責任,你會意想唔到有時一句嘅鼓勵,小小嘅零食哄下後生仔開心,係會令佢地努力行前十步,希望得到更多嘅認同和讚賞。而行前左又企唔企得穩呢,就睇上司嘅功力啦!

而一轉工無耐,心情好快掉落谷底,一來部門係好等用人之際請我番嚟,二來公司文化係要求極高效率但畀到嘅資源少之少。除左第一日返工Welcome Lunch之外,以後嘅Lunch通常都留係Office「咬個包」就算,無計啦,日日畀人「卒」到得返個Lunch可以用嚟訓下回下氣。每日如坐針氈,驚死做錯野畀阿頭話我累街坊,寫花我Apprasial……搞到每朝起身心情都掙扎一輪好想射波,直到踏入公司門口一刻要好大勇氣。開心?喺咩嚟架?如果唔係堅持想深入學多啲野,我一定好有霸氣衝入老闆房遞信然後好瀟灑咁走!可惜太細膽無「吉士」得個諗字,做咗一段時間,畀老闆折磨多過學野,浪費青春。

同樣「食過夜粥」嘅打工仔可能認為返工為開心,根本係個幼稚想法。經過幾年嘅嚴刑洗禮,明白到係工作間追求快樂係一件好被動而奢侈嘅事,相比起,最現實嘅回報,每個月尾嘅穩定收入,唔滿足但至少安心。拎著呢一筆薄酬,可以選擇用嚟做喜歡嘅事,無人有資格Judge你嘅決定,有得揀先係真正嘅快樂嘛!久經訓練過嘅,一返到公司就識自動轉Mode,對任何事都無所謂,唔想畀公司嘅政治活動同埋大帝們嘅無聊是非,騷擾到正常工作,可以大事化小,小事化無就最好。多餘嘅應酬唔會有機會見到佢地現身,安份守己夠鐘就會靜靜收工執袋走人,寧願存在感低啲,都唔想搏做多啲得到上司半句無意思嘅稱讚。

直到再轉返份穩定工嘅時候,唔多唔少睇透左,唔會再百分百在意係職場上嘅得與失,因為太多變數你控制唔到,將Focus去番自己嘅生活同興趣上,就唔會咁易鑽牛角尖激死自己。慢慢適應左呢個諗法,返工會減少不安,自製開心感覺嘅。唔好再唔食早餐Lunch一頭痛不停啪Panadol,好好地對待自己身體。長命功夫長命做,做好左Urgent嘅Task就乖乖回家呼吸下自由嘅空氣。小熊曾經畀男友話得太多,唔識放鬆神經,放假都唔識Happy到跳跳扎,我唔想再做隻悲情小熊啊!

原文轉載自HR熊 - 職場航行日誌Fb專頁,獲作者授權轉載。

延伸閱讀:
- 10大騎呢扮工活動

-【男女適用】免做煩膠6要訣

- 30歲月入5萬不是夢 要入行有幾難?

-一幅圖睇晒大學「神科」人工有幾高?

-【新手上路】返新工6個「以為」

上載日期:2016年7月21日


Share


Free Subscription

Email