【NGO】導盲犬同治療犬有咩分別? 訓練員:治療犬嘅職責就係「玩」!

撰文:霍芷晴 攝影:matt

提到香港導盲犬協會,大家一定以為協會只訓練導盲犬,但其實除了訓練導盲犬以協助視障人士外,他們自2018年起更開展了動物輔助介入服務,訓練員Fish笑言:「即係大家可能聽過的『狗醫生』或治療犬,主要為自閉症譜系障礙嘅小朋友同埋青少年提供個別或小組動物輔助治療,有時仲會去學校同長者中心做講座。」

動物輔助介入是以動物作為輔助服務媒介,透過有系統的活動或治療計劃,讓服務對象在情緒、社交、行為甚或認知能力上得到改善。動物輔助介入須由經過訓練的動物及帶領動物的人員執行。在協會工作了8年的Fish,現為犬隻輔助治療導師,她在學時修讀多媒體設計,畢業後曾做過不同的工作,不過因工作太辛苦,而決定到澳洲實踐工作假期,這一出走,就成了她的人生轉捩點。

Fish自小喜歡動物,平時更會拯救受傷的狗狗,「決定去澳洲工作假期前,有朋友喺導盲犬協會做義工,佢知我對動物相關嘅工作有興趣,就建議我不如向呢個方向發展,然後經協會推薦我喺澳洲讀導盲犬訓練相關課程,於是我喺澳洲一邊打工同讀書,用咗9個月完成課程。」課程中,Fish學習到如何訓練狗仔的行為、教導寄養家庭怎樣照顧導盲犬等知識。回港後,Fish便於協會擔任導盲犬寄養家庭督導員。

做不了導盲犬 可以做治療犬?
當時Fish的主要工作是教導寄養家庭的成員,怎樣訓練導盲犬適應家中和戶外的環境,並加強牠們工作時的專注力;3至4年後,Fish便成為了導盲犬訓練員,主力訓練每隻導盲犬服從指令及協助視障人士的能力,「並唔係每隻狗仔都適合做導盲犬,因為導盲犬需要有自主性同判斷力,同視障人士喺街上時,要有能力避開危險,要主動搵扶手、欄杆同石壆;但有啲狗仔喺呢方面嘅能力比較弱,亦可能容易受到誘惑,對氣味敏感都會好影響工作,又或者係本身健康問題影響,而令到佢哋唔適合成為導盲犬。」

 

如果做不了導盲犬,那可以怎辦?Fish表示:「所有狗仔大約1歲大就會接受訓練,訓練大約半年就會知佢哋適唔適合做導盲犬,如果唔適合,其實仲有動物輔助介入呢個選擇,即係做治療犬。因為呢班狗仔都係經過訓練,識得好多指令,而且有一定嘅服從性,只係未達到做導盲犬嘅準則,所以好適合做治療犬,而治療犬最主要嘅職責就係『同人玩』!」

即睇導盲犬與治療犬有咩分別?﹙按圖了解﹚

導盲犬 品種

.主要為拉布拉多犬

.亦有拉布拉多混金毛尋回犬

治療犬 品種

.沒有規定,不同品種都可以

.導盲犬協會以拉布拉多犬為主

導盲犬 服務對象

.視障人士

治療犬 服務對象

.小朋友、中小學生、長者

導盲犬 訓練要求

.服從性高,一定要在主人左邊坐下

.高專心度

.有自主判斷力

.眼睛和腳的機能要好

.對人不可太熱情

.一對一服務

治療犬 訓練要求

.有服從性,可以聽從不同人的指令

.親近人,願意與不同人玩

.不怕跳上跳落

.可以一對一或一對多人服務

導盲犬 退休年齡

.8歲至10歲退休,一切以健康為重

治療犬 退休年齡

.13至14歲退休,年紀太大不用太操勞,只是讓人摸都可以

*每年做評估,測試與人的互動程度再安排崗位

 

治療犬嘅職責是「玩」
Fish表示,動物輔助介入分為三個範疇,分別是動物輔助活動(Animal Assisted Activity,AAA)、動物輔助教育(Animal Assisted Education,AAE)和動物輔助治療(Animal Assisted Therapy,AAT),「我哋平日會帶治療犬探訪長者中心同學校,又會運用受過訓練嘅動物設計教學活動,促進學童學習,仲會設計合適嘅治療方案,畀服務使用者喺同狗狗互動嘅過程中得到改善。」

而治療犬於活動過程中,最主要的職責就是玩!Fish指:「我哋會畀參與者餵食治療犬,如果對象係一啲肌肉有問題嘅小朋友,就會畀佢哋同狗仔做拋波練習,改善佢哋肌肉狀況;然後又會教大家對狗仔做一些簡單指令,狗仔會完成唔同嘅動作,例如跳欄、坐低、瞓低、摘骰仔、執公仔等。大家見到狗仔咁合作又得意,會好有成功感,喺心態上同身體上都會有良好嘅改善同進步。」

治療犬令服務使用者敞開心扉
採訪當日,正好小朋友來到導盲犬協會做一對一的治療,Fish安排了治療犬Max和領犬員與他進行治療環節,Fish指:「我哋會同小朋友做一啲分類練習、畀佢同Max做角色扮演、捉棋等,從中改善佢嘅專注力同溝通能力。佢已經嚟咗幾次,返到屋企都成日同媽媽提住Max,見到佢有明顯嘅進步!

此外,Fish分享道,除了讓治療犬與小朋友進行治療外,讓牠們與長者互動的印象都很深刻,「平時啲婆婆公公可能唔太鍾意郁動,但係畀佢哋帶埋狗仔去散步就會爭住去;最記得喺疫情期間,我哋用視像通訊同一位患認知障礙嘅90歲婆婆做治療,佢本身唔係好認得狗仔嘅顏色同個名,但上咗兩至三堂,就開始記得狗仔嘅名,認得隻狗仔!」透過視像與治療犬見面,安排長者與狗仔進行圖卡、計數等靈活腦筋的活動,令長者的心情和身體都得到改善,「見到婆婆開心就最開心!」

每次看到治療犬都能令服務使用者敞開心扉,都使Fish很有成功感和感動,她希望日後可以訓練更多領犬員、導盲犬和治療犬,令更多狗仔可以幫助到有需要人士。同時,她會發掘更多新活動,應用在治療活動之上!

延伸閱讀:【醫護熱話】升職面試被迫問打咗針未?幾時打?叫幾多個同事打?

延伸閱讀:【醫護行業】退休護士抗疫 到疫苗中心助打針

延伸閱讀:【另類職人】劍擊十年 由運動員到社工 轉職感言:兩者最着重同是「溝通」

延伸閱讀:【NGO】做義工一定要賣旗、執垃圾?義工配對平台創辦人:做義工都可以WFH!

Look out for further updates on our Facebook fan page!

Looking for jobs?