Next
【未來抉擇】後悔DSE夠分無讀醫科 公屋仔不甘往後只可做中產
【未來抉擇】後悔DSE夠分無讀醫科 公屋仔不甘往後只可做中產
2022-05-10
人生一路走來總要面對不同抉擇，許多人高中畢業後也曾面對JUPAS聯招選科的過程，雖說可選科目與公開考試成績息息相關，但你又有沒有後悔當時做出的抉擇呢？早前，有一名已投身社會、擁有大學學歷的公屋仔到社交媒體的學界祕密專頁「CU Secret」大吐苦水，後悔數年前JUPAS選科的決定。
延伸閱讀：【職場熱話】文科生的迷茫 30歲月入幾多叫正常？ 基本要有OOk ？
即睇事主分享及其他網民回應：（按圖了解）
事主：「奉勸各位DSE生，夠分讀醫唔該唔好嘥！
我係過來人，利申：窮鬼公屋仔，小學、中學年年全級頭十，但當初班主任話我性格唔適合讀醫，而我自己又想未來多啲work life balance、做人輕鬆啲，又覺得自己唔夠努力同上進，考到高分都係靠天才波，本身成日打機，考前一個月先抽一半時間溫書，仲要英文得4而自卑，覺得自己唔會讀得掂醫，所以最後出到嚟夠分都無揀到醫，老豆老母有啲失望但都無講好多嘢。
讀緊嗰4年大學的確過得唔算辛苦，u-life唔錯。雖然大學都知自己係個庸才，又hea讀，個分都係below mean，但出到嚟做嘢人工都ok，高過大部分fresh grad，同埋做嘢雖然唔係dream job但都唔算好辛苦，心理同生理都幾健康，同屋企人都算過得開心，屋企生活都慢慢改善。
但慢慢覺得其實喺香港打工，其實做咩工都係無work life balance，一樣放工返到屋企食飯沖涼瞓覺，最多返工前做運動，放工後上興趣班，一個禮拜得一兩日day off做自己嘢。
一諗到人工同地位差醫生一大截，本身可以上流做上等人，但而家卻最多做個中產，個人就好失落。
老豆老母一聽到我開始後悔，又加入埋後悔一份，怨自己點解唔逼我揀醫（反正我都係個無咩主見嘅人）。果然，公屋仔就係公屋仔，窮人思維就係窮人思維，唔了解究竟醫生同普通人嘅生活質素差幾遠，驚呢樣驚個樣唔敢去搏，最後都係飲恨。我相信啲想讀醫但唔夠分嘅人，應該想鬧死我，我都想鬧死自己。」
網民：即使夠分讀醫，都千祈唔好亂咁報醫科。網民：作為專科醫生，我只係中產，唔係咩上等人上流人。
網民：建議只係為錢嘅人切勿揀med。
網民：其實就算畀你讀完醫你都未必鍾意做醫生……
網民：咁嘅價值觀嘅人好彩無揀做醫生，病人之幸！
網民：做醫生人工高，不等同於係上等上流人，人的品格也很重要，可惜很多人都混淆了其中的部份和過度拜金。
網民：仍然用咁嘅思維方式諗嘢，咁你過去讀果4年大學都係白費嘅！
網民：大把屋邨仔有一大番作為。出身無得揀，但要條路點樣行、用咩態度行、用咩胸襟嚟行……絕對可以有你自己嘅一套。令你侷限嘅唔係出身屋邨，係你嘅見解同諗嘢方式。
網民：其實樓主就係啲無主見，又想又食又拎嘅人。就係咁，完。
網民：貼地啲諗，其實係取決於身邊啲人係咩人，唔係讀得書多就係聖人。朋友可以自己選擇，同學父母同事老闆無。如果身邊每一個人都同你講無錢就嘥氣，每一日都畀人灌輸呢啲思想，有咁嘅思維好正常。
網民：香港的價值觀一向有問題，現在就更加無言了。人生無常，最終都是一樣的。即使是世界首富，也不見得一定幸福。心知足，人健康，那怕遇到無品小人，都係一笑置之和表現同情。
心態決定境界 網民慶幸事主沒讀醫科
醫科在眾多學科中可謂「神科」，每年皆取錄最頂尖的高中畢業生，各學生的公開考試成績表都群「星」拱照。縱使修讀醫科可謂不愁前途，畢業後必定獲本港醫療機構聘請，但醫療人員近年頻頻出現短缺，工作量大，未必每個人都受得住。另外，修讀醫科並非易事，需要記下的資料量龐大，多名網民勸籲欲修醫科的高中畢業生需要三思。香港大學及香港中文大學的內外全科醫學士課程年期均為6年，可見醫科生必須有專注力，以及投身醫療界的決心。
醫生判斷會影響病人性命，做醫生必先有醫德，不應將金錢放於首位。眾多網民狠批事主金錢至上的價值觀，更直言「咁嘅價值觀嘅人好彩無揀做醫生」。此外，有一以專科醫生為職業得網民表示，自己「只係中產，唔係咩上等人上流人」。
眾多網民批評事主「公屋仔就係公屋仔」的觀點，指出個人思維模式是事主切實的侷限，每事向錢看屬真正窮人思維。另有人則認為，香港社會價值觀扭曲，做人最重要的是知足常樂。
部分人則關注事主DSE英文科只有第4級，為何可修讀醫科。根據香港大學與香港中文大學的資料，DSE英文科第4級屬內外全科學士最低收生要求。
即睇兩大醫科收生標準及2021年取錄分數（按圖了解）：
香港大學內外全科醫學士（MBBS）（聯招編號：JS6456）
最低DSE成績要求
・中文科：3；英文科：4；數學科：2；通識科：2；第一選修科：3；第二選修科或數學科延伸部分（M1 / M2）：3
2021年收生成績（只公布最佳6科總成績）
・上四分位數（Upper Quartile）：47；中位數（Median）：45；下四分位數（Lower Quartile）：42
香港中文大學內外全科醫學士（MBChB）（聯招編號：JS4501）
最低DSE成績要求
・中文科：3；英文科：4；數學科：3；通識科：3；第一選修科：3；第二選修科：3
・學生必須於高中選修生物學或化學的DSE課程，並建議同時修讀生物學及化學，而數學科延伸部分（M1 / M2）並不會當作一個選修科。
2021年收生成績（以下為參照分數）
・上四分位數（Upper Quartile）：44；中位數（Median）：42.5；下四分位數（Lower Quartile）：41
延伸閱讀：【職場熱話】畢業後入政府係咪理想？ 網民：入咗去就出唔返嚟
延伸閱讀：【職場文化】求職好迷茫！調查：逾4成畢業生對進入職場無信心
Look out for further updates on our Facebook fan page!
Follow CTgoodjobs for the latest career news, hot topics and recommended jobs!