【吸金奇職】14離奇高薪職業

【吸金奇職】14離奇高薪職業

想有好前途,讀書考試係正路,但除咗呢條路,仲有好多奇怪職業未必要考試,但一樣需要專業。以下14份「奇職」絕對高薪,而且絕非「農曆新年時薪$250租男女友見家長」的江湖傳聞,全部有真實出處。所以話,路一直都在!

1/ 擁抱員
賣身?無錯,兼要畀人攬、同人瞓。但唔好心邪,純粹係畀顧客當「攬枕」,等顧客感受人間溫暖,絕無其他附帶服務。攬還攬,唔可以亂碰其他身體部位。

2/ 職業姊妹團
美國紐約有女人開公司「出租」自己幫人搞結婚,由度演詞、計Budget、整To-do List、安排場地、流程、座位表等等一手包辦、甚至到場做埋姊妹。「出租」一次,盛惠$1.6萬(港元,下同)。

3/ 專業送殯員
紅事可以「租」姊妹,白事一樣可以「租」人扶靈。英國有公司專門出租送殯員出席葬禮、悼念死者。每兩小時收約$500,生意旺季,每人月賺超過$4萬。

4/ 骨灰工藝師
骨灰除咗可以整鑽石留念,喺美國仲可以整玻璃雕塑、水晶球、頸鏈等,都係靠骨灰工藝師。

5/ 口臭評估員
評估員每日要用鼻去聞測試者個口,評估產品除唔除到口臭,受聘於各大口腔潔淨產品同香口膠公司。

6/ 面部膚感評估員
評估員負責用手摸測試者臉頰,測試各大護膚品、剃刀的效用。必須接受專業訓練,只得兼職,時薪大概$200。

7/ 電視搵片員
於各大電視頻道尋找有用片段,受聘於美國名咀會,周薪$5,000。

8/ 排隊黨
專排隊買飛再炒黃牛,邊度有嘢炒,邊到有佢。

9/ 狗糧試味員
受聘於寵物飼料公司,負責為貓糧狗糧試味。同試酒一樣,嗒一嗒,唔會吞落肚。

10/ 狗隻滑浪教練
美國加州聖迭戈有專教狗狗滑浪的教練,每堂包埋滑浪板同狗狗救生衣。香港未見有,肯定有Market,滑浪高手不妨考慮考慮。

11/ 雞仔性別識別員
負責分辨初生雞仔性別,需受訓3年。點分?睇Pat Pat同睇翼形,每小時要分到700隻,準確度須達98%,月薪近$4萬,英國同日本的商業孵化場急需相關人才。

12/ 蛇毒採集員
徒手採集蛇的毒液,係世上最危險的工作之一。然後向醫療或科研機構售賣蛇毒,每克可賣到$7,800。

13/ 除冰巡邏隊
這隊因鐵達尼號沉沒而誕生的國際海冰巡邏隊,不須將冰山劈開,但要專責追蹤對船隻有危險的冰塊,拖離航道,避免意外發生。

14/ 幸運金句寫手
負責寫幸運曲奇入面啲金句,於美國從事幸運金句寫手,月薪折合港元有近$3萬!

 

Look out for further updates on our Facebook fan page!

Related Articles

More