【職場熱話】返新工每日OT幾個鐘 網民苦惱應否辭職

不少人認為香港人奴性強，每日OT、放工仍被老細訊息轟炸都不足為奇，從不反抗。近日有網民於討論區發帖指，在新公司上班一星期，每天都OT數小時，詢問是否要辭職轉工。

事主指出，見工面試時所講述的工作時間與實際上班日的時間不同，「本身話係返8時30分至5時30分，但做落每晚都9點先收得工」。此外，原本所說的5天半工作，基本上星期六要返全日。事主形容，這工作人工不高，又不能學到特別技能，正考慮應否裸辭。

OT好正常？網民籲勿助長歪風
不少網民支持事主辭職，「830至9做死人咩，而家無嘢已經咁，遲下有突發嘢咪要日日瞓公司」、「做落去會搞到心理有問題」、「蠶食私人時間但你學唔到嘢嘅工唔走留嚟等過年咩」、「一、兩個月空窗期其實好小事」。

有網民認為，事主唔捱得，「90後唔捱得，人人都OT啦」。不過，有網民指出，應改變「OT好正常」的想法，「如果全港人都改變OT好正常呢個諗法，我哋呢啲打工仔就會走出牢獄，根本OT風氣係由我哋呢啲打工仔吹出嚟，驚僱主乜乜乜，我哋全人類拒絕OT，最頭痛就係萬惡腦細」。